Almatyda koronavirýstyń úndi shtamy anyqtaldy. Bul týraly Almaty qalasy sanitariialyq-epidemiologiialyq baqylaý departamentiniń basshysy, qalanyń bas memlekettik sanitar dárigeri Jandarbek Bekshin málim etti, dep habarlaidy "Ult aqparat".
«Keshe 22 maýsym kúni keshke «delta» shtamynyń bolý múmkindigi anyqtaldy. Biz ony búgin taǵy bir ret rastadyq. Mýtatsiialanǵan delta shtamynyń shynymen de ainalymda bar ekeni belgili boldy», - dedi ol.
Sonymen qatar, ol atalǵan shtamdy kim juqtyrǵanyn atap ótti.
«Ol - 1984 jyly týǵan K. esimdi azamatsha. Úi sharýasyndaǵy áiel, esh jerde jumys istemeidi. Kúieýi ary-beri kóp júretin mamandyq iesi, qazir shetelde issaparda júr. Aita ketý kerek, onyń joldasy aqpan aiynda koronavirýspen aýyrǵan. Al naýqastyń ózi qazir aýrýhanada jatyr. Onymen bailanys jasaǵan jeti adam oqshaýlandy. Epidemiologiialyq tekserý júrgizilip jatyr. Ázirge áieldiń bul shtamdy naqty qai jerde juqtyrǵany belgisiz. Ol kisi birneshe nysanda bolǵan. Ol jerler baqylaýǵa alyndy», - dedi Jandarbek Bekshin.
Onyń aitýynsha, nátijesi oń shyqqan PTR-testerdi tekserip shyqqan kezde 89 paiyzynan virýs mýtatsiiasy anyqtalǵan.
«12-19 maýsym aralyǵynda mýtatsiialanǵan shtamdardyń ainalymyn anyqtaý úshin PTR-diagnostika júrgizdik. 53 zertteýdiń 44-inen - britandyq shtamm, ekeýinen – ońtústikafrikalyq, bireýinen niý-iorktik shtamm anyqtaldy. Qalǵan 11 paiyzynda virýs mýtatsiiasy anyqtalmady», - dedi Bekshin.
Buǵan deiin densaýlyq saqtaý ministrligi elde koronavirýstyń "úndistandyq shtamyna uqsaityn" mýtatsiia anyqtaldy, zertteý júrgizilip jatyr dep málimdegen. Soǵan bailanysty elde karantin kúsheiýi múmkin ekeni de eskertilgen.
22 maýsymda Nur-Sultan ákimdigi astanada qosymsha tekserý nátijeleri "úndistandyq shtamm" baryn kórsetti dep málimdegen. Seisenbi kúni qalada karantindi kúsheitý týraly sheshim qabyldandy. Vedomstvoaralyq komissiianyń otyrysy da ótip, elde qyzmet kórsetý salasynda isteitin kompaniialar men iri mekeme qyzmetkerlerine vaktsina mindetti bolatyny belgili boldy.
Koronavirýstyń úndistandyq shtamy - SARS-CoV-2 virýsynyń tórtinshi nusqasy. Dúniejúzilik densaýlyq saqtaý uiymy ony ǵalamdyq deńgeide alańdaýshylyq týdyratyn shtamdar tizimine engizgen. Bul tizimge virýstyń tez juǵatyn, aýrýdy asqyndyryp jiberetin jáne vaktsina men dári-dármekke boi bermeitin túrleri engen. Úndistandyq shtamm 70-ten astam elde anyqtalǵan. Buǵan deiin atalǵan shtamnyń Qazaqstan kórshisi Reseide de anyqtalǵany habarlanǵan edi.
