Almatynyń 34 mektebin «jaryp jibermek» bolǵan jasóspirim ustaldy. Bul týraly QR IIM ekstremizmge qarsy is-qimyl departamenti bastyǵynyń orynbasary Darhan Razýev aitty, dep habarlaidy QazAqparat.
«Jalǵan habarlama berý tásilderi sanaýly. Mysaly, olardyń 85 paiyzǵa jýyǵy mobildi telefon arqyly habarlanǵan. Aqparattyq tehnologiianyń damýyna bailanysty ǵalamtor jelisi arqyly da kelip túsken habarlamalar bar. Ondai faktiler 8 paiyz shamasynda. Olardy ashý kóbirek ýaqyt qajet etedi. Alaida mundai qylmystar da jazasyz qalmaidy. Mysaly, osy jyly Almaty qalalyq politsiia departamentiniń qyzmetkerleri 34 mektepke elektrondyq poshtamen jalǵan habarlama taratqan jasóspirimdi ustady. Qazirgi ýaqytta tergeý júrgizilip jatyr», - dedi edi ol IIM baspasóz qyzmeti alańynda brifing barysynda.
Onyń atap ótýinshe, jalǵan «jarylǵysh zat» adamdar kóp jinalatyn saýda úileri, bazarlarǵa, dúkenderge, memlekettik organdar men bilim berý mekemelerine, vokzal men áýejaiǵa qoiylady.
«Búgingi tańda quqyq qorǵaý organdarynda mundai qylmystarmen kúresýde barlyq múmkindik bar. Zamanaýi tehnikalyq quraldarmen jabdyqtalǵan. Qońyraý shalǵan adam daýysyn ózgertse de, sim-kartasy men telefonyn aýystyrsa da, ol báribir tabylady. Qylmystardyń 90 paiyzdan astamy «izi sýymai» kelesi táýlikte ashyldy», - dedi Darhan Razýev.
Departament bastyǵynyń orynbasary usynǵan statistikaǵa qaraǵanda, sońǵy 10 jylda osy sanattaǵy qylmys edáýir azaiǵan.
«Atap aitqanda, 2011 jyly 123 fakti, al byltyr 50 fakti tirkelgen. Biyl 8 ai ishinde 52 qylmystyq is tirkelip otyr. Onyń 28-i sotqa joldandy. Qazirgi ýaqytta 16 adamǵa qatysty úkim shyǵaryldy», - dedi ol.
