1 aqpannan bastap Almatyda barlyq halyqaralyq reis boiynsha sanitarly-karantindik baqylaý kúsheitildi.
Bul týraly Almatyda ótken brifing barysynda qalalyq taýarlar men qyzmetterdiń sapasy men qaýipsizdigin baqylaý departamentiniń basshysy Aizat Moldaǵasymova málim etti, dep habarlaidy "Ult aqparat".
Qazirgi tańda Almatyda koronavirýs infektsiiasynyń aldyn alý jáne taratylýyn boldyrmaý maqsatynda profilaktikalyq sharalar legi júrgizilip jatyr. 2020 jyldyń 3 aqpanynan bastap Qytaidan keletin barlyq reister toqtatylady. QHR-dan keletin reisterdiń oqshaýlyq qaǵidaty saqtalady. Qytaidan keletin áýe kemeleriniń bári jeke turaqqa ornalastyrylyp, jolaýshylar men ekipaj músheleri áýejaidyń terminalymen bailanysy joq arnaiy aýmaqtan ótedi.
«1 aqpannan bastap barlyq halyqaralyq reis boiynsha sanitarlyq-karantindik baqylaý kúsheitiledi. Álemniń 26 elinde koronavirýs juqtyrýdyń 160 jaǵdaiy tirkeldi. Búgingi tańda barlyq reis qadaǵalanýda», - dedi Aizat Moldaǵasymova.
Sanitarlyq-karantindik baqylaýdy kúsheitýge 80 epidemiolog pen 8 brigada jumyldyrylǵan. Táýlik boiy 30 epidemiolog barlyq reis boiynsha jumys júrgizedi.
«Almaty halyqaralyq áýejaiy respýblikadaǵy eń iri áýejailardyń biri. Kúnine munda 50 reis oryndalady. Bir ýaqytta 5 reistiń oryndalatyn kezi de bolady. Dál osy reisterde koronavirýske kúdikti adamdarǵa qatysty sanitarlyq baqylaý kúsheitilgen», - dedi ol.
Aita keterligi, áýejaiǵa kelgen adamdardyń bárine birden baqylaý ornatylady. Áýejai jańasha tehnologiiadaǵy teplovizormen qamtylǵan. Bortta temperatýrany 2-den 3 metrge deiingi qashyqtyqta janaspai kórsetetin bailanyssyz teplovizor jumys isteidi. Áýejaida statsionarlyq jylý túsirgishter bar. Olar tehnikalyq parametrler boiynsha uzaq qashyqtyqta temperatýrany ólshei alady. Sonymen qatar, koronavirýstyq infektsiiaǵa kúdikti adamdardy tekserý úshin jeke jeldetý júiesi bar súzý aimaqtary qarastyrylǵan.
«Ushaqta olar tek tekserý júrgizip qana qoimaidy. Sonymen qatar epidemiologiialyq turǵydan qolaisyz elderden kelgeni jaily anamnez jinap, saýalnamalar júrgiziledi, búkil reisterde kelgenderdiń bárine meditsinalyq baqylaý tolyq kólemde júrgiziledi. DDSU málimetteri boiynsha, anamnez tek Qytaidan keletin jolaýshylardan ǵana emes, sonymen qatar koronavirýstyq infektsiialar tirkelgen elderden kelgen basqa da jolaýshylardan jinaqtalady», - dep túsindirdi Aizat Moldaǵasymova.
Sonymen qatar, zerthanalyq zertteýler kataraldy qubylystardyń belgileri bolǵan jaǵdaida ǵana júrgizilýi kerek.
«Barlyǵyna jalpy zerthanalyq diagnoz qoiýdyń qajeti joq. Statistika kórsetkendei, adamdardyń 99,9 paiyzynda JRVI, ártúrli shtamdar, al qalǵandarynda ártúrli sanattaǵy virýstar (koronavirýs emes) anyqtalǵan», - dep atap ótti spiker.
Osy jyldyń 18 qańtarynan bastap Qytaidan Almatyǵa 4904 adam kelip, olardyń 90 paiyzy baqylaýǵa alynǵan. Atalǵan azamattardy meditsinalyq uiymdardaǵy derekterin tabý jáne tekserý jumystary júrgizilýde.
Aizat Moldaǵasimova sonymen qatar barlyq klinikada juqpaly aýrýlardyń belgileri bar adamdarǵa arnalǵan oqshaýlaǵyshtar ashylatynyn aitty. Bul sheshim koronavirýstyq infektsiianyń aldyn alý jáne ýaqtyly anyqtaý úshin qabyldanǵan.
Almatyda eńbek etetin Qytai azamattarynyń jaǵdaiyn tekserý boiynsha bólek jumystar júrgizilip jatyr. Barlyq kásiporynda, sonyń ishinde jataqhanalarda, qonaqúilerde, meiramhanalarda, dámhanalarda reid júrgizilýde. Jalpy, Almaty qalasyndaǵy jaǵdai turaqty.
Megapoliste koronavirýs juqtyrý faktisi tirkelgen joq. Virýstyq aýrýlardyń aldyn-alý úshin Aizat Moldaǵasymovanyń aitýynsha, jeke gigienanyń qarapaiym erejelerin saqtaý kerek: qoldy jýyp, halyq kóp jinalatyn oryndarǵa kóp barmaý, meditsinalyq maska kiiý, belgileri anyqtalǵan jaǵdaida dárigermen keńesý jáne immýnitetti kóterý. Qajetti aqparatty alý úshin 1406 Call-ortalyǵyna táýlik boiy habarlasýǵa bolady.
