Biyl «Jumyspen qamtýdyń jol kartasy» aiasynda 214 jobany júzege asyrý josparda. Munda 26 myń jumys orny ashylady. Bul týraly Almaty qalalyq ál-aýqat basqarmasynyń basshysy Rahat Shimasheva brifing barysynda málim etti, dep habarlaidy "Ult aqparat".
«Atap aitqanda, jańadan 9 mektep boi kóteredi. 13 bilim mekemesine qosalqy ǵimarat salý josparda. 520 orynǵa arnalǵan 3 balabaqshanyń qurylysy bastalady jáne 95 mektepke deiingi mekeme kúrdeli jóndeýden ótedi. Sondai-aq, №7 qalalyq aýrýhanany taǵy 64 tósekke keńeitý kózdelgen»,– deidi Rahat Shimasheva.
Sonymen qatar,ol birqatar jobalar injenerlik-kólik infraqurylymyn, TKSh jelilerin keńeitý men jańǵyrtý, aýmaqtardy abattandyrý maqsatynda iske asyrylatynyn atap ótti.
«Mysaly, Naýryzbai aýdanynda sýmen jabdyqtaýdyń jańa jelileriniń qurylysy bastalady. Sondai-aq, Alataý, Túrksib aýdandarynda jol qurylysy júrgiziledi. Búginde barlyq aýdandardaǵy joldarda ortasha jáne aǵymdaǵy jóndeý jumystary bastaldy. Atap aitqanda, 363 aýlaǵa kúrdeli jóndeý jáne qoǵamdyq aimaqtarǵa abattandyrý jumystary júrgiziledi. Jalpy, «Jumyspen qamtýdyń jol kartasy» aiasynda 26 myń adam jumyspen qamtylady»,- deidi Almaty qalalyq ál-aýqat basqarmasynyń basshysy.
«Jumyspen qamtýdyń jol kartasy» iske asyrylǵannan keiin jańa nysandardyń qurylysy esebinen 2045 jańa turaqty jumys oryndary ashylady.
