Foto: Aviasales.kz
Máslihattyń 30-sessiiasynda Qarjy basqarmasynyń basshysy Qanat Sýhambekov 2025 jylǵa arnalǵan naqtylanǵan biýdjet týraly baiandama jasap, 97 mlrd teńge qosymsha qarajat memlekettik satyp alýlardaǵy únem, qarajatty qaita bólý, ótken jyldan qalǵan qaldyqtar men kiristerdiń artýy esebinen qalyptasqanyn atap ótti, dep habarlaidy Ult.kz.
Biýdjettiń basty baǵyttary – áleýmettik sala, infraqurylym, TÚKSh jáne tsifrlandyrý.
Densaýlyq saqtaý salasyna 17 mlrd teńge bólindi. Bul qarajat 4 emhananyń qurylysyn júrgizýge, meditsinalyq jabdyqtar men dári-dármekter satyp alýǵa, №23 emhana men «Alaý» ońaltý ortalyǵyn jóndeýge baǵyttalady.
Mádeniet salasy 9,4 mlrd teńge alady. Qarajat Sats atyndaǵy teatrdy qaita jóndeýge, kitaphanalar men kommiýniti-ortalyqtar ashýǵa jumsalady.
Turǵyn úi-kommýnaldyq sharýashylyqqa 17,5 mlrd teńge bólinip otyr. Bul qarjy sý qubyry men káriz júiesiniń qurylysyna, elektrmen jabdyqtaý men gazdandyrýdy damytýǵa, turǵyn úilerdi jóndeýge jáne órt qaýipsizdigi júiesin ornatýǵa jumsalady.
Kólik salasyna 13,6 mlrd teńge qarastyrylǵan. Bul qarjy jol qurylysyn aiaqtaýǵa, jańa joldardyń jobasyn ázirleýge, 900 elektrondy tablo ornatýǵa jáne ziiatkerlik kólik júiesin engizýge baǵyttalady.
Negizgi nazar áleýmettik salaǵa aýdaryldy. Atalǵan salany qarjylandyrýdyń jalpy kólemi 652,9 mlrd teńgeni qurady. Qarjynyń 27,9% -y bilim berýge bólingen. Negizgi mindetterdiń qatarynda: balabaqshalarǵa kezekti azaitý, oqý oryndarynyń jetispeýshiligin joiý, bilim berý sapasyn arttyrý jáne qosymsha oqytýdy damytý. Mektepterdegi qaýipsizdikke de kóp kóńil bólinedi.
Qazir qalanyń barlyq 216 mektebi zamanaýi qaýipsizdik júielerimen — beinekameralarmen, dabyl túimelerimen, týrnikettermen jáne órt dabylymen jabdyqtalǵan.
Densaýlyq saqtaý mańyzdy baǵyt bolyp qala beredi. Sońǵy jyldary alǵash ret emhanalar men ońaltý ortalyqtaryn kúrdeli jóndeý, aýrýhanalarǵa, perzenthanalarǵa jáne alǵashqy meditsinalyq kómek ortalyqtaryna arnalǵan zamanaýi meditsinalyq jabdyqtardy satypalý josparlanýda.
