Almaty ákimdigi búgin jol-infraqurylymy jobalary týraly onlain konferentsiia ótkizdi, dep habarlaidy QazAqparat.
«Almatyda jalpy joldyń uzyndyǵy 3 096 km. Onyń ishinde sapasy jaqsy joldardyń úlesi salmaǵy 2019 jyly 75 %-ǵa jetkizildi. Barlyǵy 2 322 km boldy. Almaty ákiminiń tapsyrmasymen 2020 jyly bul kórsetkishti 80%-ǵa jetkizý kózdelgen», - dedi Qalalyq mobildilik basqarmasy basshysynyń orynbasary Ernur Abjahan.
2019 jyly qalanyń damý josparyna sáikes T.Rysqulov pen Qulja tas joly jol airyǵy paidalanýǵa berildi. Sonymen qatar, Súiinbai dańǵylynyń Hmelnitskii men Sholohov kóshesi aralyǵyndaǵy ýchaskesi qaita jóndeýden ótti.
2020 jyly 3 iri jolairyǵynyń: T.Rysqulov –Emtsov, S.Seifýllin dańǵyly – I.Jansúgirov kóshesi, Buqtyrma – Qulja tas joly nysandarynyń qurylysy aiaqtalady.
«Qazir T.Rysqulov dańǵylynyń ońtústik jaǵynda jol jabyndysy tóselip jatyr. Al soltústiginde úiler áli súrilip jatyr. Áli birneshe nysan tolyq tárkilengen joq. Bul jumystar kelesi jyly tolyq aiaqtalady», - dedi Ernur Abjahan.
S.Seifýllin – I.Jansúgirov jol airyǵynda úiler súrilip jatyr. Biyl tonnelder salynyp, 2021 jylǵa qarai jumys tolyq aiaqtalady.
Buqtyrma – Qulja tas joly jolairyǵynda da qala men oblys territoriiasyndaǵy jer ýchaskelerin tárkileý júrip jatyr.
