Almaty zoobaǵy 31 jasar aq aiý Alkormen qoshtasty, dep habarlaidy "Ult aqparat".
Bul aqparat zoobaqtyń Instagram jelisindegi resmi paraqshasynda jariialandy.
«Búgin qaiǵyly kún. Alkordyń jaǵdaiy qiyndap jatqanyn habarlaǵan bolatynbyz. Sońǵy 2 aida Resei, Izrail zoobaqtarynyń veterinar dárigerlerimen, EAZA mamandarymen birlese otyryp, Alkordy emdeý úshin barynsha kúsh saldyq. Biraq kárilikti emdei almaimyz. Sońǵy ýaqytta ol jeńsik asynan da bas tarta bastady. Halyqaralyq zoobaqtar qaýymdastyǵynyń mamandarymen keńese otyryp búgin osy bir aýyr sheshimdi qabyladyq. Alkordy qinalýdan qutqarý úshin veterinarlar evtanaziia jasady. Alkor bizdiń júregimizde máńgilik qalady»,- delingen jazbada.
Ol Almaty zoobaǵyna 1990 jyly 1 jasar qonjyq kezinde kelgen. Biyl 7 jeltoqsanda aiý 31 jasqa toldy.
Munyń aldynda zoobaq Alkordyń ahýaly nasharlaýyna bailanysty volerdiń áinek qabyrǵasyn japqan bolatyn.
Eske sala ketsek, aq aiý Halyqaralyq Qyzyl kitapqa engen. Qazir álemde 20 myń aq aiý ǵana bar.
