Almaty qalasy mobildilik basqarmasy basshysynyń orynbasary Ernur Ábjahan onlain brifing barysynda qaladaǵy joldardyń sapasy jaily aitty, dep habarlaidy "Ult aqparat".
8 sáýirdegi jaǵdai boiynsha qaladaǵy 287 kóshede jóndeýdi qajet etetin 1 844 ýchaske anyqtalǵan.
«12 sáýir kúni qala kóshelerindegi 205 shuńqyr jamalyp, 15 qaqpaq túzetildi. Sonymen qatar, qalanyń kommýnaldyq jáne injenerlik qyzmeti qazǵan 564 shuńqyr anyqtaldy. Taǵy 30 shuńqyrdy jekemenshik uiymdar qazǵan. Qazir qala kóshelerin jóndeýge 36 brigada, 160 arnaiy tehnika, 394 jumysshy tartyldy. Iaǵni, qaladaǵy 35 kóshede jóndeý jumysy júrgizilip jatyr», - dedi ol.
Almatyda 3 096,8 shaqyrym jol bar, sonyń 298,5 shaqyrymyna áli asfalt tóselmegen. 2025 jylǵa deiin qalada 350 shaqyrym jańa joldyń qurylysy júrgizilmek.
«Biyl 200 kóshede 196,5 shaqyrym aýmaqqa ortasha jóndeý júrgiziledi. Onyń ishinde 17 magistraldy kóshe bar. Atap aitqanda T.Rysqulov, Súiinbai, Q.Sátbaev, Kúderin, Raiymbek, B.Momyshuly, S.Seifýllin jáne taǵy basqalary. Sáýir aiynda montaj jumystaryna daiyndyq bastalady. Al asfal tóseý jumysy mamyr aiynda júrgiziledi. Magistraldy kóshelerdi jóndeý jumysyn shilde aiynyń sońyna deiin aiaqtaýdy josparlap otyrmyz. Basqa kóshelerdi jóndeý jumysy qazan aiyna deiin jalǵasady», - dedi Ernur Ábjahan.
Sonymen qatar, ol qaladaǵy 10 yqshamaýdanda joldar kúrdeli jóndeýden ótetinin tilge tiek etti.
