Almaty qalasynda Jeńistiń 75 jyldyǵyna arnalǵan is-sharalar engizilgen tótenshe jaǵdai men karantin rejimine bailanysty ótkizilmeidi, - dep habarlaidy QazAqparat.
Koronavirýs infektsiiasy taralýynyń aldyn alý maqsatynda Almaty ákimdigi janyndaǵy tótenshe jaǵdai rejimin qamtamasyz etý jónindegi jedel shtab turǵyndarǵa adamdar kóp jinalatyn jerlerge, memorialdar men zirattarǵa barýdan bas tartýǵa shaqyrady. Bul usynys 28 gvardiiashy-panfilovshylar atyndaǵy saiabaqtaǵy Máńgilik alaýǵa gúl shoqtaryn qoiý rásimine de qatysty aitylǵan.
«Bizdiń ákelerimiz ben atalarymyzdyń erligi máńgilik. Bizdiń soǵys ardagerleri men tyl eńbekkerlerin osy aitýly kún – Uly Jeńis kúnimen quttyqtaǵym keledi jáne olarǵa myqty densaýlyq, ashyq aspan tileimin. Osy jyl – mereitoi jyly, iaǵni fashizmdi jeńgen Uly Jeńiske 75 jyl, árine, biz ony laiyqty qarsy alýǵa daiyndalǵanbyz. Biraq ókinishke qarai, ol álemdegi osyndai qorqynyshty tótenshe jaǵdaiǵa sáikes keldi. Osyǵan bailanysty, barlyq qalalyqtardan, birinshi kezekte aǵa býyn ókilderinen saiabaqtar men skverlerge barýdan bas tartýlaryńyzdy suraimyn. Óitkeni, dál qazirgi jaǵdaida olar qaýiptiń aldynda tur, sondyqtan da qalalyqtardan ardagerlermen kezdespeýin suraimyz», – dep atap ótti Almaty qalasynyń Tótenshe jaǵdaidy qamtamasyz etý jónindegi Jedel shtab tóraǵasynyń orynbasary Erlan Qojaǵapanov.
Sondai-aq, ol azamattar kóp jinalatyn jerlerde Politsiia departamenti tarapynan jaiaý jáne avtomobildi patrýldeý kúsheitiletinin jetkizdi.
Osyǵan bailanysty, kezekti ret azamattarǵa karantin men sanitarlyq-epidemiologiialyq normalardy múltiksiz saqtaý týraly eske salamyz. Bul talaptardy elemeý zańnamaǵa sáikes jaýapkershilikke tartatynyn umytpaǵan jón.
