Almaty qalasynyń ákimi Baqytjan Saǵyntaev jańa turǵyn úi baǵdarlamasy týraly aitty, dep habarlaidy QazAqparat.
«Biz «Almaty jastary 3.0» degen jańa baǵdarlama ázirledik. Bul turǵyn úi baǵdarlamasynyń biregeiligi onyń tómen paiyzdyq mólsherlemesinde. 13 million teńgege deiingi nesie jyldyq 5 paiyzdyq jeńildikpen beriledi», - dedi Baqytjan Saǵyntaev qala turǵyndarymen esep berý kezdesýinde.
Baǵdarlama boiynsha nesieni óteý merzimi 3 jyldan 25 jylǵa deiin, tólem qabilettiligine qarai esepteledi. Bastapqy tólem - 10%.
Ákimdik bul baǵdarlamaǵa 10 milliard teńge bóldi. Qazaqstannyń turǵyn úi qurylys jinaq banki 3 milliard teńge qarastyryp otyr. Qatysýshylar bastapqy jáne ekinshi deńgeili turǵyn úi baǵdarlamasy boiynsha páter satyp ala alady.
Qala ákiminiń aitýynsha, baǵdarlamanyń maqsaty – biýdjet salasyndaǵy jas qyzmetkerlerge qoldaý kórsetý (35 jasqa deiin). Bul muǵalimder, dárigerler, ýniversitet oqytýshylary, mádeniet, sport salasynyń ókilderi, jýrnalister men ǵalymdar.
Jalpy, Almatyda 8,4 myń kóppáterli turǵyn úi qory bar. Bul eldegi eń úlken turǵyn úi qory bolyp sanalady. Turǵyn úige degen suranys jyl saiyn ósýde. Búginde 25 533 azamat baspana kezeginde tur, bul ótken jylmen salystyrǵanda 4,5 myń adamǵa kóp.
Byltyr 3162 adam baspanamen qamtamasyz etildi, onyń ishinde 520 kópbalaly otbasy men 114 balalar úiiniń túlekteri bar. Sonymen qatar, 2019 jyly 1050 jumys isteitin jastar jaldamaly páter kiltterin aldy.
Biyl 2020 jyly 3 810 otbasyn baspanamen qamtamasyz etý josparlanǵan. Olardyń ishinde 1300–den astam páter «Bakytty otbasy» baǵdarlamasy boiynsha Turǵyn úi qurylys jinaq banki jelisi arqyly satylatyn bolady.
Halyqty baspanamen qamtamasyz etý - ákimdiktiń basty mindetteriniń biri. Sonymen qatar, Almatydaǵy eski úiler máselesine erekshe kóńil bólinedi. Búgingi kúni apatty 81 úidi buzý jáne 700-ge jýyq otbasyna jańa baspana berý týraly kelisimderge qol qoiyldy.
