Migratsiialyq halyqqa qyzmet kórsetý ortalyǵy jaqynda Almaty men Aqtóbe qalalarynda ashylady. Bul týraly «Azamattarǵa arnalǵan úkimet» memlekettik korporatsiia» KEAQ Basqarma tóraǵasy Abylaihan Ospanov habarlady.
«Biz árqashan da halyqqa jaqynbyz. Olardyń kóshi-qon salasyndaǵy qyzmetterdi sapaly ári jaily alýy úshin pilottyq joba retinde Astanada ashqan bolatynbyz. Buǵan qosa, shetel azamattary Qazaqstanda qujat alý jeńil ekenin sezinip, olarǵa barlyq jaǵdai jasalatynyn kórý kerek. Biz munyń bárin ońtailandyryp, jeńildettik. Aldaǵy ýaqytta migratsiialyq HQKO-ny Almaty jáne Aqtóbe qalalarynda ashý josparda bar», – dedi A. Ospanov.
Sondai-aq, ol migratsiialyq HQKO-da qujat rásimdeý úshin ketetin ýaqyttyń azaiǵanyn da tilge tiek etti.
«Buryn JSN-di alý úshin Salyq komitetine, meditsinalyq saqtandyrýdy alý úshin emhanaǵa, ómirin saqtandyrý úshin saqtandyrý kompaniiasyna baryp kóp ýaqyt jumsaityn. Al, búginde barlyǵy bir jerge shoǵyrlandy», – dep túiindedi tóraǵa.
Aita keteiik, qazirgi tańda migratsiialyq HQKO Astanada bar. Ol pilottyq joba retinde 2018 jyldyń 12 qańtarynda ashylǵan bolatyn. Onda sheteldik azamattarǵa barlyq qyzmet kórsetiledi. Buryn bul qyzmetterdi alýǵa 5 kún ketse, qazir osy jerden 1-2 saǵattyń kóleminde qol jetkize alady.
Esterińizge sala ketelik, HQKO 2007 jyly tóreshildik pen ákimshilik kedergilerdi joiý maqsatynda qazaqstandyqtarǵa bir tereze qaǵidaty boiynsha memlekettik qyzmetter kórsetý úshin quryldy. Barlyǵy úshin teń qoljetimdilikti qamtamasyz etý, túrli organdardyń qujattaryn daiyndaý jónindegi qyzmetterdi bir jerde alý múmkindigin jasaý, sondai-aq qujattardy oryndaýshy men azamattardyń arasynda tikelei bailanysty boldyrmaý HQKO nyń basty oń qasietterine ainaldy. Elbasy tapsyrmasy boiynsha elimizde júzege asyrylyp jatqan «bir tereze» jobasynyń tiimdiligi tolyq dáleldenip otyr.
Sonymen qatar búginde HQKO arqyly aqyly qyzmetter kórsetý jumysy qarqyndy júrýde. Aldaǵy ýaqytta da bul qyzmetti barlyq tutynýshylar paidalana otyryp ýaqyt únemdep tez arada qujattaryn daiyndatyp alýyna bolady. Qyzmet jeke jáne zańdy tulǵalarǵa kórsetiledi.HQKO ári qarai da halyqqa jemisti eńbek ete bermek.
