Almaty turǵyny Qýat Ahmetov qaladaǵy iri saýda dúkenderiniń biri "Arzan" sýpermarketin sotqa berdi. Shaǵym berýshiniń aitýynsha, sýpermarket "taýarlardyń ataýyn qazaq tilinde jazbai, eskertýdi oryndamaǵan". 25 qazanda onyń shaǵymy boiynsha Almatynyń Alataý aýdandyq sotynda aldyn ala sot tyńdaýy ótti.
- Adam sýpermarketke kelip, taýar ataýyn memlekettik tilde oqyǵysy keledi. Biraq qazaq tilinde eshteńe jazylmaǵan. Bul degen - diskriminatsiia. Negizi zań boiynsha, 102-ge zvondap, sol jerge politsiia kelip, aiyppul salýǵa mindetti. Biraq bul zańdardyń bári oryndalmaidy. Prokýratýra men ákimdikke bardym. Eń aiaǵynda sýpermarket eshteńeni de ózgertpedi. Eriksiz sotqa júgindim, - deidi Ahmetov.
"Arzan" sýpermarketiniń iesi "Optovyi klýb" kompaniiasynyń ókili Jasulan Tiýlkin bul máseleni tehnikalyq sebeppen bailanystyrady. Ol "jumys jasalyp jatyr, baǵdarlama eski, ony jańartý kerek" dedi.
Ahmetovtiń shaǵymy boiynsha ótken Alataý aýdandyq sotyndaǵy alǵashqy otyrysta sýdia Dáýren Aiqulov isti Almaly aýdandyq sotynyń qaraýyna beretinin málimdedi. Sebebi, saýda ortalyǵynyń iesi "Optovyi klýb" kompaniiasynyń zańdy mekenjaiy sol aýdanda ornalasqan.
Azattyq tilshisi "Arzan" sýpermarketine de baryp qaitty. Saýda ortalyǵynda satýǵa qoiylǵan taýar attary orys tilinde jazylyp tur.
Qazaqstannyń "Tutynýshylar quqyǵyn qorǵaý týraly" zańy boiynsha, taýar jaily qazaq tilinde de aqparat berý – satýshynyń mindeti. Qazaqstanda memlekettik til - qazaq tili. Biraq orys tiliniń de resmi qarym-qatynas retinde qoldanys aiasy keń.
