Almatyda ógei qyzyn óltirdi degen kúdikpen 47 jastaǵy er adam qamaýǵa alyndy. Bul týraly QR Ishki ister ministrliginiń ókili Shuǵyla Berikqyzy málim etti, dep habarlaidy QazAqparat.
«Almaty oblysynyń 47 jastaǵy turǵyny 13 jasar qyzyn óltirdi degen kúdikpen qamaýǵa alyndy. 23 shilde kúni Talǵar qalasyndaǵy jer úilerdiń birinen zorlyq-zombylyq belgileri bar 13 jasar qyzdyń denesi tabyldy. Oqiǵa ornyna kelgen jedel tergeý toby qajetti is-sharalar ótkizip, qyzdyń ógei ákesin kúdikti dep tanydy. Belgili bolǵandai, er adam qyzdyń anasymen azamattyq nekede turǵan eken. Jedel-izdestirý is-sharalary barysynda oqiǵa ornynan jasyrynǵan kúdiktini Almaty qalasynyń aýmaǵynda Almaty oblysynyń kriminaldyq politsiia qyzmetkerleri ustady», - dedi Sh. Berikqyzy IIM-de onlain ótken baspasóz máslihaty barysynda.
IIM ókiliniń málimdeýinshe, qazirgi ýaqytta ustalǵan er adam ýaqytsha ustaý izoliatoryna qamaldy. Sotqa deiingi tergeý amaldary júrgizilip jatyr.
«Ishki ister ministri Erlan Turǵymbaev birneshe ret atap ótkendei «balalar – qoǵamnyń eń qorǵalmaǵan bóligi jáne olardyń baqytty ári qaýipsiz balalyq shaqtaryn qamtamasyz etý úshin barlyq sharalardy qabyldaý bizdiń mindetimiz. Balany renjitken nemese jábirlegen, oǵan psihologiialyq nemese fizikalyq jaraqat keltirgen adamdar qatań jazalanýy kerek. Ókinishke qarai, balalarǵa qatysty zorlyq-zombylyqtyń aldyn alýǵa baǵyttalǵan zańnamany jetildirip, qataitýǵa qaramastan, mundai qylmys túrleri jalǵasýda. Atalǵan qylmys túrleri kóbinese politsiiaǵa qoljetimdiligi shekteýli turǵyn úilerde jasalatyndyqtan, onyń aldyn alý óte qiyn», - deidi ol.
Ministrliktiń málimetine súiensek, elimizde kámeletke tolmaǵandarǵa qatysty jynystyq qylmystardyń 70%-dan astamyn balalardyń týystary, jaqyn adamdar jasaidy. Iaǵni, analardyń birge turatyn adamdar, ógei ákeleri, týystary, kórshileri, tanystary bolyp keledi.
