Almatyda jappai tártipsizdik kezinde turǵyndar úilerin búlikshilerden qorǵap qalǵan. Oqiǵanyń mán-jaiyn turǵyndar aityp berdi, dep habarlaidy QazAqparat.
Almatylyq turǵyndardyń bastan keshkenderin prodiýser Sáken Belgibaev Facebook paraqshasynda bólisti.
Oqiǵa Nazarbaev dańǵyly 220/3 mekenjaiynda kópqabatty turǵyn úide bolǵan. Ol jerde birneshe meiramhana bolǵan jáne buzaqylyq kezinde olardy qiratqan.
Onymen qoimai buzaqylar úidi gazben jarǵysy kelgen. Jáne sol sátte kópqabatty turǵyn úide túrli sebeptermen adam az bolǵan.
Úiin buzaqylardan qorǵaý úshin áielder, egde jastaǵy kisiler men jergilikti aýla tazalaýshy Arlan shyqqan.
«5 qańtar. Tańǵy serýenge shyqtym. Túske qarai miting bastaldy. Balkonnan qarap 100-ge jýyq áskerdi baiqadym, qarýsyz, jas sarbazdar. Olar úshin qoryqtym. Sol sátte bir top adam kelip sarbazdardyń kaskasyn, qorǵanysh quraldaryn tartyp ala bastady. Al sarbazdar bolsa jan-jaqqa qashyp ketti. Mitingke shyqqandar qarapaiym adamdar emes siiaqty bolyp kórindi. Beibit miting degenimiz - adamdardyń belgili bir talappen, ideiamen nemese naqty bir máseleni kóterip shyǵýy. Balkonnan basymdy shyǵaryp «Úilerińe tarańdar» dedim. Meni baiqaǵan bireýi qorqyta bastady», - dedi kýáger.
Kýáger kórshileriniń aitýynsha, buzaqylar kópqabatty turǵyn úidiń jertólesin órtegen.
«Bizdiń úidiń irgesinde 6 meiramhana bar. Turǵyndar baǵaly zattarymyz ben qujatymyzdy alyp ne bolyp jatqanyn bilý úshin syrtqa shyqtyq. Dala qarańǵy. Meiramhana ieleri joq, onyń esigin ózimiz ashýǵa tyrystyq. Bárimizdi úrei basyp, sasqalaqtap qaldyq. Úi órtenip jatyr. Dereý órt sóndirý qyzmetine habarlastyq. Ol kelgenshe turǵyndar sý tasyp sóndirýge tyrysty. Sol jerde bolǵan kisiler kómektesti. Bir kezde meiramhanynyń birinen qolynda alkogoli bar bireý shyqty. Ol órt sóndirýge kedergi jasap, «órtene bersin» dedi. Men onyń betinen salyp qaldym, keiin ol ketip qaldy», - deidi Kamila Aitqalieva.
Birneshe áreketten keiin turǵyndar meiramhananyń esigin ashyp, aýla tazalaýshy Arlan órtti aýyzdyqtaǵan.
Turǵyndardyń aitýynsha, kommýnaldyq qyzmet jumysshysy úidi qorǵaý áreketiniń bas-aiaǵynda bolyp, ol da basyn qaýipke tikken.
