Almaty taýlarynda 73 jastaǵy sheteldik týrist úsh kúnnen beri izdestirilip jatyr. Ol 28 qyrkúiekte Talǵar asýy mańynda, shamamen 3200 metr biiktikte joǵalǵan, dep habarlaidy ult.kz.
TJM málimetinshe, er adam «Shymbulaq» arqyly taýǵa kóterilgen toppen birge barǵan. Keiin saparyn jalǵyz jalǵastyryp, qalaǵa ózi túsetinin aitqan. Alaida qonaqúige oralmaǵan.
Izdeý jumystaryna 50-ge jýyq adam, 8 tehnika, 7 dron, 3 kinologiialyq top jáne «Qazaviaqutqarý» tikushaǵy jumyldyryldy. Politsiia, qutqarýshylar men eriktiler de izdeýge qatysyp jatyr.
Mamandar taý shatqaldary men soqpaqtardy tekserip, beinebaqylaý jazbalaryn qarap, týristerden aqparat jinaýda. Izdeý jumystary táýlik boiy jalǵasyp jatyr.
