Almaty qalalyq qylmystyq ister jónindegi mamandandyrylǵan aýdanaralyq sotynda "shekaradan kontrabandalyq taýar ótkizbek boldy" jáne "transulttyq uiymdasqan topqa qatysty" dep kúdikke ilingen Qyrǵyzstan Parlamentiniń burynǵy depýtaty Damirbek Asylbekýýlý men 11 adamnyń sot otyrysy jalǵasty, dep habarlaidy Azattyq.
Tańerteń 10.00-de bastalǵan sot otyrysyna ondaǵan adam qatysty. Eki prokýror is boiynsha sotqa tartylǵan 12 adamǵa aiyptaý aktisin jeke-jeke kezektese oqydy.
Aiyptaýshylardyń sózinshe, kúdiktilerdiń "transulttyq uiymdasqan top qurǵany" tolyq dáleldengen. Olar "ekonomikaǵa 99 million teńge kóleminde zalal kelgenin" aityp, bul somany aiyptalýshylar esebinen memleket paidasyna óndirýdi surady.
Almatyda abaqtyda otyrǵan Qyrǵyzstan Jogorký keneshiniń burynǵy depýtaty Damirbek Asylbekýýlýn prokýrorlar Qylmystyq kodekstiń mindetterine adal qaramaý (254-bap) jáne ekonomikalyq kontrabanda baptarymen (234-bap) aiypty dep tanyp, 12 jyl bas bostandyǵynan aiyrýdy, qaýipsizdigi joǵary mekemege jiberip, eks-depýtatty elden jazasyn ótegen soń ǵana shyǵarýdy surady.
Aiyptaý aktisi boiynsha, Qyrǵyzstan parlamentiniń depýtaty qyzmetin atqaryp júrgen Asylbekýýlý 2016 jyly qarashada paida tabý jáne zańsyz baiý maqsatynda óziniń qyzmetin paidalanyp, transulttyq uiymdasqan qylmystyq top qurǵan. Prokýrorlar "eks-depýtat bul topty Qyrǵyzstannan Qazaqstan men Reseige taýarlar jiberip, ekonomikalyq kontrabanda úshin basqarǵan" dedi.
Prokýrorlardan soń sóz alǵan Asylbekýlýýnyń advokaty Asqar Baimuratov eks-depýtatqa taǵylǵan aiyptarmen kelispeitinin aitty. Onyń sózinshe, aiyptar "oidan quralyp, qoldan jasalǵan".
Tergeý "uiymdasqan top basshysy" dep ataǵan kúdiktiniń biri Esbol Japbasovqa - 15 jyl, qalǵan kúdiktilerge 7-12 jyl aralyǵynda túrme jazasyn kesýdi surady.
Prokýrorlar kúdiktilerdiń "qylmystyq jolmen tapqan dúniesin" tárkileýdi surady.
Aita keteiik, Damirbek Asylbekýýlý 2018 jyly 15-16 aqpan kúnderi sol kezdegi Ońtústik Qazaqstan oblysy men Jambyl oblysynda ótken arnaiy operatsiia barysynda ustalǵan. Arnaiy operatsiiada ustalǵan 35 adamnyń arasynda keden organdary, shekara qyzmetiniń laýazymdy tulǵalary, brokerler bolǵan. Ustalǵandardyń úsheýi – Qyrǵyzstan azamaty.
Bul is boiynsha Asylbekýýlýnan ózge 11 adam sotqa tartylǵan.
Almaty qalasynyń Almaly aýdandyq soty 17 aqpanda Qyrǵyzstan azamattaryn eki aiǵa qamaý týraly sheshim shyǵaryp, keiin qamaý merzimi birneshe ret uzartylǵan. Sot kezinde depýtattyń Qazaqstan azamattyǵynan airylǵany belgili boldy.
