Almaty prokýratýrasy «Sulpak» dúkenine irgeles aýmaqty abattandyrý kezinde jeke kásipkerdiń aǵashty zańsyz kesýine qatysty tekserýdi bastady, dep habarlaidy "Ult aqparat".
Ýákiletti memlekettik organdar bul aǵashtardy kesýge ruqsat bermegen.
Atalǵan derek boiynsha Almaty qalasynyń tabiǵatty qorǵaý prokýratýrasy QR QK 340-baby (aǵashtar men butalardy zańsyz kesý, joiý nemese búldirý) boiynsha sotqa deiingi tergep-tekserýdi bastady.
«Tergeý barysynda tiisti saraptama taǵaiyndalady. Saraptama nátijesinde tabiǵatqa kelgen zalal tekserilip, quqyqtyq baǵa beriledi. Sotqa deiingi tergeý Almaty qalasy prokýratýrasynyń baqylaýynda bolady», - dedi qalalyq prokýratýranyń baspasóz qyzmetinen.
Eske sala ketsek, 23 qarashada túnde Almatyda saýda úiiniń janyndaǵy jaiqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi.
«Qazir aýdan ákimdigi men politsiia departamenti kesilgen aǵashtardyń tuqymy men sapasyn anyqtaý úshin oqiǵa ornynda jumys istep jatyr. Aiypty tulǵalar anyqtalǵan soń Politsiia Departamenti olardy jaýapkershilikke tartady. Tolyǵyraq aqparatty anyqtaý jumystary aiaqtalǵan soń jariialaimyz», - dep málim etti qala ákimdigi.
Prezident Qasym-Jomart Toqaev Almaty qalasy Tóle bi kóshesindegi aǵashtardyń otalǵanyna qatysty jaǵdaiǵa nazar aýdardy.
Memleket basshysy Almaty ákimi Baqytjan Saǵyntaevqa atalǵan jaǵdaiǵa bailanysty qyzmettik tekserý júrgizip, kinálilerdi jaýapkershilikke tartýdy tapsyrdy.
