Almaty men Astana halyqaralyq QS Best Student Cities 2027 reitinginde óz kórsetkishterin jaqsartyp, Qazaqstannyń joǵary bilim berý salasyndaǵy óńirlik kóshbasshy retindegi pozitsiiasyn nyǵaitty, dep habarlaidy ult.kz.
Biylǵy reitingte Almaty 13 satyǵa kóterilip, álem boiynsha 78-orynǵa jaiǵasty. Bul – Qazaqstan qalalarynyń QS Best Student Cities reitingine qatysý tarihyndaǵy eń joǵary nátije ári Ortalyq Aziiadaǵy úzdik kórsetkish. Al Astana 8 satyǵa joǵarylap, 119-orynnan kórindi.
QS Quacquarelli Symonds halyqaralyq agenttigi ázirleitin reiting qalalardy alty negizgi kriterii boiynsha baǵalaidy. Olar – ýniversitetterdiń akademiialyq bedeli, qalanyń tartymdylyǵy, túlekterdiń eńbek naryǵyndaǵy suranysy, bilim alý men ómir súrýdiń qoljetimdiligi, stýdenttik qaýymdastyqtyń halyqaralyq ártúrliligi jáne stýdentterdiń pikirleri. Biyl zertteýge álemniń 150 qalasy engen.
Almatynyń kórsetkishiniń jaqsarýyna qaladaǵy joǵary bilim berý júiesiniń damýy yqpal etti. Qalada QS World University Rankings 2027 reitingine engen toǵyz ýniversitet ornalasqan. Sonyń nátijesinde Almaty «ýniversitetterdiń reitingterdegi nátijeleri» kórsetkishi boiynsha álemde 50-orynǵa kóterildi.
Qazaqstannyń basty artyqshylyqtarynyń biri – joǵary bilimniń qoljetimdiligi. Oqý aqysy men ómir súrý shyǵyndarynyń qoljetimdiligi boiynsha Astana álemde 9-orynǵa, Almaty 24-orynǵa ie boldy. Bul kórsetkishter qazaqstandyq qalalardyń sheteldik stýdentter úshin qarjylyq turǵydan tartymdy baǵyttardyń birine ainalyp kele jatqanyn kórsetedi.
Sonymen qatar, reitingte stýdenttik qaýymdastyqtyń halyqaralyq ártúrliligi kórsetkishi de jaqsarǵan. Bul qazaqstandyq joǵary oqý oryndarynyń álemniń túrli elderinen keletin jastar arasynda suranysynyń artyp kele jatqanyn ańǵartady.
Mamandardyń pikirinshe, Almaty men Astananyń QS Best Student Cities 2027 reitingindegi joǵarylaýy Qazaqstannyń joǵary bilim berý júiesiniń halyqaralyq básekege qabilettiliginiń artyp, eldiń jahandyq bilim berý keńistigindegi ornynyń nyǵaiyp kele jatqanyn kórsetedi.
