الماتى مەن استانا حالىقارالىق QS Best Student Cities 2027 رەيتينگٸندە ٶز كٶرسەتكٸشتەرٸن جاقسارتىپ, قازاقستاننىڭ جوعارى بٸلٸم بەرۋ سالاسىنداعى ٶڭٸرلٸك كٶشباسشى رەتٸندەگٸ پوزيتسيياسىن نىعايتتى, دەپ حابارلايدى ult.kz.
بيىلعى رەيتينگتە الماتى 13 ساتىعا كٶتەرٸلٸپ, ەلەم بويىنشا 78-ورىنعا جايعاستى. بۇل – قازاقستان قالالارىنىڭ QS Best Student Cities رەيتينگٸنە قاتىسۋ تاريحىنداعى ەڭ جوعارى نەتيجە ەرٸ ورتالىق ازيياداعى ٷزدٸك كٶرسەتكٸش. ال استانا 8 ساتىعا جوعارىلاپ, 119-ورىننان كٶرٸندٸ.
QS Quacquarelli Symonds حالىقارالىق اگەنتتٸگٸ ەزٸرلەيتٸن رەيتينگ قالالاردى التى نەگٸزگٸ كريتەريي بويىنشا باعالايدى. ولار – ۋنيۆەرسيتەتتەردٸڭ اكادەمييالىق بەدەلٸ, قالانىڭ تارتىمدىلىعى, تٷلەكتەردٸڭ ەڭبەك نارىعىنداعى سۇرانىسى, بٸلٸم الۋ مەن ٶمٸر سٷرۋدٸڭ قولجەتٸمدٸلٸگٸ, ستۋدەنتتٸك قاۋىمداستىقتىڭ حالىقارالىق ەرتٷرلٸلٸگٸ جەنە ستۋدەنتتەردٸڭ پٸكٸرلەرٸ. بيىل زەرتتەۋگە ەلەمنٸڭ 150 قالاسى ەنگەن.
الماتىنىڭ كٶرسەتكٸشٸنٸڭ جاقسارۋىنا قالاداعى جوعارى بٸلٸم بەرۋ جٷيەسٸنٸڭ دامۋى ىقپال ەتتٸ. قالادا QS World University Rankings 2027 رەيتينگٸنە ەنگەن توعىز ۋنيۆەرسيتەت ورنالاسقان. سونىڭ نەتيجەسٸندە الماتى «ۋنيۆەرسيتەتتەردٸڭ رەيتينگتەردەگٸ نەتيجەلەرٸ» كٶرسەتكٸشٸ بويىنشا ەلەمدە 50-ورىنعا كٶتەرٸلدٸ.
قازاقستاننىڭ باستى ارتىقشىلىقتارىنىڭ بٸرٸ – جوعارى بٸلٸمنٸڭ قولجەتٸمدٸلٸگٸ. وقۋ اقىسى مەن ٶمٸر سٷرۋ شىعىندارىنىڭ قولجەتٸمدٸلٸگٸ بويىنشا استانا ەلەمدە 9-ورىنعا, الماتى 24-ورىنعا يە بولدى. بۇل كٶرسەتكٸشتەر قازاقستاندىق قالالاردىڭ شەتەلدٸك ستۋدەنتتەر ٷشٸن قارجىلىق تۇرعىدان تارتىمدى باعىتتاردىڭ بٸرٸنە اينالىپ كەلە جاتقانىن كٶرسەتەدٸ.
سونىمەن قاتار, رەيتينگتە ستۋدەنتتٸك قاۋىمداستىقتىڭ حالىقارالىق ەرتٷرلٸلٸگٸ كٶرسەتكٸشٸ دە جاقسارعان. بۇل قازاقستاندىق جوعارى وقۋ ورىندارىنىڭ ەلەمنٸڭ تٷرلٸ ەلدەرٸنەن كەلەتٸن جاستار اراسىندا سۇرانىسىنىڭ ارتىپ كەلە جاتقانىن اڭعارتادى.
مامانداردىڭ پٸكٸرٸنشە, الماتى مەن استانانىڭ QS Best Student Cities 2027 رەيتينگٸندەگٸ جوعارىلاۋى قازاقستاننىڭ جوعارى بٸلٸم بەرۋ جٷيەسٸنٸڭ حالىقارالىق بەسەكەگە قابٸلەتتٸلٸگٸنٸڭ ارتىپ, ەلدٸڭ جاھاندىق بٸلٸم بەرۋ كەڭٸستٸگٸندەگٸ ورنىنىڭ نىعايىپ كەلە جاتقانىن كٶرسەتەدٸ.
