Almaty ortalyq meshitinde «Kúshimiz – birlikte» qaiyrymdylyq sharasy ótti, dep habarlaidy QazAqparat.
Qaiyrymdylyq aktsiiasy aiasynda 1 myń muqtaj otbasyǵa kómek kórsetildi. Árbir otbasyǵa qajetti azyq-túlikter salynǵan qoraptar taratyldy.
Sharaǵa qatysqan bas múfti Naýryzbai qajy Taǵanuly qaiyrymdylyq sharasyn uiymdastyrý sebebin aitty.
«Dini basqarmanyń jumys baǵytynyń biri – qaiyrymdylyq kórsetý. Jýyrda Memleket basshysy Qasym-Jomart Toqaevtyń bastamasymen «Qazaqstan halqyna» qoǵamdyq áleýmettik qory quryldy. Din qyzmetkerleri de qoldaý kórsetýdi bastady. Osy rette sabyr men turaqtylyq bizdiń taban tireitin tuǵyrymyz bolýy tiis. Bul qiyndyq ta óter, keter. Biraq, bizdiń sabyrymyz, birligimiz, berekemiz ketpeýi kerek», - dep atap ótti Naýryzbai qajy Taǵanuly.
Aita keteiik, qaiyrymdylyq sharasy barysynda meshitke tirkelgen otbasylar kelip, bas múftidiń qolynan qajetti azyq-túlikter aldy. QMDB tóraǵasy mundai igi isterdiń jyl boiy jalǵasatynyn jetkizdi.
Sondai-aq búgin Almatyda bas múfti qaiǵyly oqiǵa kezinde qaza tapqan azamattardyń otbasylaryna baryp, kóńil aitty.
