QR Prezidentiniń kómekshisi — QR Prezidenti Ákimshiliginiń Ótinishterdi qaraýdy baqylaý bóliminiń meńgerýshisi Aida Balaeva Taldyqorǵan qalasyndaǵy «Nur Otan» partiiasynyń oblystyq filialynda kóshpeli qabyldaý ótkizdi, dep habarlaidy "Ult aqparat".
– Kez kelgen máseleniń durys sheshimin taýyp, turǵyndarǵa tiimdi bolýyna memlekettik bilik pen qoǵamdyq uiymdar birleskende ǵana qol jetkize alamyz. Ol úshin kemshin túsip, olqy soǵyp jatqan máselelerdi ashyp jetkizý – barshanyń basty mindeti. Iaǵni, árbir turǵyn memlekettiń durys damýyna jariialylyqpen, ashyqtyqpen úles qosa alady. Elimizde osy baǵyttaǵy sharalar qolǵa alynyp, árbir óńirde Qoǵamdyq keńesterdiń jumysy jandanýda. Eń bastysy, bilik pen qoǵamdyq uiymdar birlese, keńese qadam basqanda ǵana jaqsy nátijege qol jetkizetinin umytpaýymyz kerek. Meniń búgingi saparym da osyǵan negizdelgen, - dedi qoǵamdyq qabyldaý barysynda Aida Ǵalymqyzy.
Jetisý turǵyndary ózderin alańdatqan máselelerdi ashyq aityp, tolǵandyrǵan saýaldarǵa jaýap izdedi. Prezidenttiń kómekshisi – Prezident Ákimshiliginiń ótinishterdi qaraýdy baqylaý bólimi meńgerýshisiniń qoǵamdyq qabyldaýynda kóterilgen máseleler birneshe baǵytty qamtydy. Aitylǵan pikirlerdi salmaqtai kelgende, óńirde jeke otbasylyq jaǵdaidan bastap, kúlli jurtshylyqty alańdatqan birqatar ózekti máseleler bary aityldy. Ásirese, qabyldaýǵa jazylǵan aýyl turǵyndary respýblikalyq, oblystyq deńgeidegi avtojol boiynda kisi óliminiń jii oryn alatynyna alańdýshylyq bildirdi. Al qala mańy turǵyndary qorshaǵan ortany lastaǵan kásiporyndardyń beiqamdyǵyna narazylyq bildirip, jergilikti atqarýshy biliktiń dármensizdigine shaǵymdandy.
Sondai-aq qoǵamdyq qabyldaý kezinde turǵyndar aýdan ortalyqtaryndaǵy negizgi kóshelerdiń áli kúnge deiin asfalttalmaǵanyna nalyp, meditsinalyq qyzmet kórsetý isinde olqylyqtarǵa jol beriletindigin de jasyrmady. Negizinen aýyldyq óńirden kelgen turǵyndar zeinetkerlerdi emdeýdiń joldaryn júielendirý kerektigin, káriz júielerinen shyqqan jaǵymsyz iistiń kórshilerdi mazalaitynyn, júgeri ósirýshilerge beriletin sýbsidiianyń tek ónim alǵan soń ǵana tietinin, aýylsharýashylyq tehnikasyn lizingpen alýdyń tiimsizdigin aitsa, shaǵymdanýshylardyń bir toby KSRO kezinde jinaq kitapshasynda jinaqtalǵan somalardyń qaitarylmai qalǵanyn, qylmystyq isti tergeýdi qolǵa alǵan tergeýshilerdiń jii aýysatynyn, sol arqyly shaǵymdanýshy aryzynyń aiaqsyz qalatynyn jasyrmai jaiyp saldy.
Buqara tarapynan aitylǵan máselelerdi saraptai kele, aimaq turǵyndaryn alańdatqan birneshe jaǵdai syn tezine alyndy. Olardyń qatarynda oblys boiynsha jumyssyzdyqtyń statistikalyq kórsetkishi naqty derektermen sáikespeitinin, múgedek balalardyń bilim alýyna beriletin kómekter men múmkindikterdiń júielenbegeni jaiynda suraqtar ótkir tur eken. Baspana kezegine qatysty daý-damaidyń kóptigi men kóp balaly analardyń janaiqaiy da kezdesýde nazardan tys qalmady.
Qoǵamdyq qabyldaýǵa kelgen 106 adamnyń aryz-armanyn muqiiat tyńdaǵan Aida Ǵalymqyzy jergilikti jerde sheshiletin máselelerge jaýapty laýazymdy sheneýnikterdi synǵa alyp, turǵyndar ótinishiniń barlyǵy Prezident ákimshiligine jetkizetinin aitty.
- Turǵyndar tarapynan aitylǵan tilekter men talaptar protokolǵa kirgizildi. Soǵan bailanysty barlyq máselelerdi qajetti deńgeide qarastyratyn salalardyń basshylaryna jetkizemin. Aitylǵan barlyq másele zań aiasynda sheshiledi dep senemin, – dedi qoǵamdyq qabyldaýdy qortyndylaǵan sózinde Qazaqstan Respýblikasy Prezidenti Qasym-Jomart Toqaevtyń kómekshisi – Prezident Ákimshiliginiń ótinishterdi qaraýdy baqylaý bóliminiń meńgerýshisi Aida Balaeva.
