Almaty oblysynda COVID-19 ósý qarqyny 0,2% qurady. Qazir aimaqta COVID-19 virýsynyń yqtimal ekinshi tolqynyna daiyndyqty kúsheitti, - dep habarlaidy "Ult aqparat".
Óńirde sońǵy aptada virýstyń ósý qarqyny 0,2% qurady. Bul týraly «JETISÝ MEDIA» aqparattyq alańynda oblystyń bas dárigeri Ómirzaq Niiazbekov málimdedi.
Onyń aitýynsha, qazirgi tańda statsionarlyq emdeýde barlyǵy 149 adam bar. Onyń ishinde 33 adam infektsiialyq statsionardyń 1 deńgeiinde, 109 adam infektsiialyq statsionardyń 2 deńgeiinde em qabyldap jatyr.
«Oblys boiynsha koronavirýstyń ósý qarqyny táýligine de, sońǵy aptada da 0,2% qurady. Jalpy COVID-19 virýsyn juqtyrǵan 5 204 naýqas tirkeldi, onyń 4 872 - i saýyǵyp shyqty, 81 -i emdelýde», – dedi ol.
Pandemiianyń yqtimal ekinshi tolqynyna 5280 tósek-oryn daiyndaldy. Indetke qarsy turý maqsatynda oblys ortalyǵynda 200 tósek oryndyq modýldik infektsiialyq aýrýhana paidalanýǵa berildi. Odan bólek Taldyqorǵan jáne Almaty qalalaryndaǵy kópsalaly aýrýhanalardyń bazasynda aýyr naýqastarǵa shuǵyl kómek kórsetý úshin zamanaýi jabdyqtarmen jabdyqtalǵan ortalyqtar quryldy. Sondai–aq, balalar juqpaly aýrýlar aýrýhanalarynyń bazasynda balalarǵa arnalǵan eki COVID-ortalyǵy qosymsha jaraqtandyrylýda.
Oblystyń 13 aýrýhanasy ottegi stansasymen qamtamasyz etiledi. Onyń ishinde 12 ottegi stansasy jumys isteidi. Qazirgi ýaqytta Sarqan aýdandyq aýrýhanasy stantsiiaǵa qosylady. Budan basqa, 1070 ottegi kontsentratory satyp alyndy, daiyndalǵan 5 280 tósektiń 40% ottegimen qamtamasyz etiletin bolady.
