Almaty oblysynyń ákimi Qanat Bozymbaev óńirde qordalanǵan jaiylym máselesine qatysty jumys josparyn jetkizdi. Esterińizge sala keteiik, óńir halqy buǵan deiin mal baǵatyn jaiylym jerdiń joqtyǵyn jetkizgen bolatyn, dep habarlaidy QazAqparat.
«Almaty oblysynda jaiylymnyń joqtyǵyna qatysty biraz aýylda osyndai jailar bar. Apparat otyrysynda árbir ákimge tapsyrma berdim. Iaǵni, ár aýyldyń tóńireginde jatqan jerlerdi túgendep, halyqtyń malyn sanap, tiisti jerin aýyl halqyna qaita berýdi tapsyrdym», -dedi Qanat Bozymbaev.
Óńir basshysy ázirge bul máseleniń keminde bir-eki jyl kóleminde sheshiletinin jetkizdi.
«Sot arqyly sheshemiz be, basqasha sheshemiz be, qazir zań bizge quqyq berip jatyr. Sony qolǵa alyp, biz jasaimyz. Jeke menshik jer bolsa da ózimizge alyp, tiisti aýyl okrýgine beremiz. Bul úlken jumys. Bir emes, eki jyldyń ishinde atqarylatyn is. Oǵan ýáde beremin. Keibir aýyldarda osy jumysty bastadyq», - dedi aimaq basshysy.
