Qasym-Jomart Toqaev Almaty oblysynyń ákimi Marat Sultanǵazievti qabyldady, - dep habarlaidy "Ult aqparat" Aqorda saityna silteme jasap.
Aimaq ákimi Memleket basshysyna Almaty oblysynyń áleýmettik-ekonomikalyq damýynda oń dinamika bar ekenin aityp, strategiialyq damý jobasy týraly baiandady.
Damýdyń negizgi 5 baǵytynan turatyn qujat 2 kezeńdi qamtidy. Ol 2025 jylǵa deiin jáne 2030 jylǵa deiin júzege asyrylmaq. Almaty oblysynda taiaý ýaqytta investitsiianyń ósimin 455 milliard teńgeden 686,5 milliard teńgege deiin arttyrý josparlanǵan. Osy maqsatta quny 618 milliard teńge bolatyn ári 7 myńnan astam jumys ornyn ashýǵa múmkindik beretin 132 jobanyń investportfeli jasaqtalǵan.
Oblys ákiminiń aitýynsha, Almaty aglomeratsiiasynyń aimaqaralyq josparyna sáikes, oblystaǵy nysandar injenerlik jáne áleýmettik infraqurylymmen qamtamasyz etiledi.
Sondai-aq aimaqtaǵy eń ózekti problemanyń biri - úsh aýysymdy mektepter máselesi qalai sheshiletindigi aityldy. 2025 jylǵa deiin "Jaily mektep" jobasymen 51 mektep salý josparlanǵan. Sebebi oblysta úsh aýysymdy mektepter kóp. Sonymen qatar oblys jetekshi joǵary oqý oryndary men kolledjderdiń filialdary, daryndy balalarǵa arnalǵan mektep litsei, "G 4 City" aýmaǵynda meditsinalyq haby men ǵylymi-bilim berý aimaǵy bar "Gate District" ashylady, "Bilimdi ult" ulttyq jobasynyń aiasynda 11 kolledjdiń materialdyq-tehnikalyq bazasy nyǵaitylady.
Prezidentke usynylǵan málimetterge sáikes, óńirde 38 meditsina nysany salynady. Oǵan qosa, oblys ortalyǵynda 500 oryndyq kópsalaly aýrýhana qurylysy jobalanǵan.
Oblys ekonomikasyn damytýdyń negizin qaita óńdeý sektory, agroónerkásiptik keshen, kólik, logistika jáne týrizm quramaq. Óńir basshysynyń aitýynsha, qazirdiń ózinde oblysta 2626 jumys ornyn ashýǵa múmkindik beretin quny 290 milliard teńgelik 23 joba iske asyrylyp jatyr. Agroónerkásip kesheni salasynda 3330 jumys ornyn ashýǵa múmkindik beretin quny 210 milliard teńge bolatyn 78 joba júzege asyrylyp keledi. AÓK jobalary oblystyń barlyq aýdanynda qolǵa alynǵan. Marat Sultanǵazievtiń aitýynsha, týrizm salasynda jetistikter bar. Almaty oblysynda ornalasqan ulttyq parkterge keletinder sany kóbeigen.
Qasym-Jomart Toqaev kezdesý sońynda oblys damýynyń strategiialyq josparyn tiisti memlekettik organdarmen birlesip júzege asyrýdy tapsyrdy.
