Almaty oblysynyń taýlarynan tabylǵan adam súieginiń 2007 jyly joǵalyp ketken qazaqstandyq azamatqa tiesili ekeni belgili boldy. Bul týraly onyń qyzy Nelli Miheeva áleýmettik jelide málimdedi, dep habarlaidy ult.kz.
Nelli Miheevanyń aitýynsha, máiitti Belarýsten kelgen týrister muzdyq erigennen keiin taý arasynan baiqap qalǵan.
«Búgin bizdiń otbasymyz úshin bir jaǵynan qaiǵyly, ekinshi jaǵynan qýanyshty kún. 19 jyldan keiin ákemniń súiegi tabyldy. Severtsev muzdyǵy erip, Belarýsten kelgen týrister ony baiqap, ótip ketpei, ákemniń súiegi men riýkzagyn taýyp alǵan. Olarǵa kóp raqmet», – dedi ol.
Áieldiń aitýynsha, bastapqyda qurbysy oǵan áleýmettik jelidegi riýkzaktyń sýretin jiberip, onyń ákesiniń sómkesine uqsaitynyn aitqan. Nelli sýretke qarap, riýkzaktyń ákesine tiesili ekenin birden tanyǵan.
Onyń sózinshe, ákesi 2007 jyly eski keńestik stanokty riýkzakpen taýǵa ketken. Mundai riýkzaktyń dál sondai úlgisiniń basqa adamda bolýy ekitalai bolǵan.
Osydan keiin Nelli Tótenshe jaǵdailar ministrligine habarlasyp, tergeýshiniń bailanys nómirin alǵan. Politsiia otbasyda saqtalǵan qujattar men fotosýretterdi suratqan.
Keiin tergeýshi riýkzaktyń ishinen Nellidiń ákesiniń atyna berilgen jeke kýálik tabylǵanyn habarlaǵan.
«Qazir bizge qoldaý kórsetip, álemniń ár túkpirinen habarlasyp jatqan adamdardyń barlyǵyna alǵys aitamyn. Qandai sezimde ekenimdi ózim de bilmeimin. Oqiǵanyń, osyndai qaiǵyly jolmen bolsa da, aiaqtalǵanyna qýanyshtymyn. Endi onyń denesin jer qoinyna tapsyra alamyz. Biraq munyń bárin qaita bastan ótkerý óte aýyr», – dedi Nelli Miheeva.
Osylaisha, 19 jylǵa sozylǵan izdeý jumystary qaiǵyly bolsa da, otbasyna belgisizdiktiń núktesin qoiýǵa múmkindik berdi.
Aita keteiik, keshe Almaty taýlarynda adam súiekteri tabylǵanyn jazǵanbyz.
