QR Indýstriia jáne infraqurylymdyq damý ministri Roman Skliar Shamalǵandaǵy jolaýshylar poiyzy men avtobýstyń soqtyǵysyna qatysty pikir bildirdi, dep habarlaidy QazAqparat.
«Keshe 15 qyrkúiekte keshki ýaqytta Aqseńgir-Shamalǵan ótkelinde №43 jolaýshylar poiyzy №456 nómirli Almaty-Qaskeleń avtobýsymen soqtyǵysyp, bir adam – avtobýs júrgizýshisi kóz jumdy. Taǵy úsheýi zardap shekti. Men ministrliktiń jáne óz atymnan qaza bolǵan adamnyń týǵan-týystaryna kóńil aitamyn. Jol-kólik oqiǵasyn tergeý boiynsha arnaiy komissiia qurdy. Onyń quramyna Kólik komitetiniń, «Qazaqstan temir joly» ulttyq kompaniiasynyń laýazymdy qyzmetkerleri endi», - dedi QR Indýstriia jáne infraqurylymdyq damý ministri Roman Skliar OKQ-da ótken baspasóz máslihatynda.
Roman Skliardyń aitýyna qaraǵanda, poiyz oqiǵa ornyna 2434 metrge jaqyndaǵan kezde avtomatty túrde ótkeldi signalizatsiia qurylǵysy men daýys signaly qosylǵan.
«Baǵdarshamdan osy kezde qyzyl túske jandy. Ótkelde kólik turǵandyqtan, shlagbaým tolyǵymen jabylmai qalǵan. Avtobýs osy kezde ótkelge shyǵyp ketip, keptelistiń saldarynan ótkeldiń ústinde turyp qalǵan. Poiyz saǵatyna 97 shaqyrymmen kele jatqan kezde ótkelge 500 metr qalǵanda mashinist shuǵyl tejegishti basqan. Alaida jolaýshylar avtobýsymen soqtyǵysty aldyn alý múmkin bolmaǵan», - deidi ol.
Eske sala ketsek, keshe Shamalǵan stantsiiasynda poiyz ben avtobýs soqtyǵysqan bolatyn. Aldyn ala boljam boiynsha, avtobýs temir joldyń relsine shyǵyp ketken.
Oqiǵa ornynda avtobýs júrgizýshisi mert bolyp, taǵy 3 adam Qarasai aýdandyq aýrýhanasynyń jansaqtaý bóliminde jatyr. Onyń ekeýi bala.
Qazir atalǵan fakti boiynsha QR QK 345-babynyń 3-tarmaǵy boiynsha is qozǵalyp, tergeý júrip jatyr. Istiń tergelýin Bas kóliktik prokýratýra óz baqylaýyna aldy.
