Foto: depositphotos.com
Almaty oblysynda 73 jastaǵy zeinetker telefon alaiaqtarynyń qurbany bolyp, jalǵyz baspanasynan aiyryldy. Belgisizder ózderin politsiia men Ulttyq bank qyzmetkerleri retinde tanystyryp, áieldi «arnaiy operatsiiaǵa» qatysyp jatyrsyz dep sendirgen, dep habarlaidy Ult.kz KTK arnasyna silteme jasap.
Tamara Shin ómiriniń kóp bóligin ótkizgen páterin alaiaqtardyń nusqaýymen ózi satýǵa májbúr bolǵan. Qaskóiler oǵan úidi tómen baǵamen ótkizý kerek ekenin aityp, jalǵan «qupiia kelisimderge» qol qoiǵyzǵan. Olar páterdi satýǵa arnalǵan habarlandyrýdy da ózderi jariialap, satyp alýshyny «operatsiiaǵa qatysýshy adam» retinde tanystyrǵan.
Zeinetker olardyń sózine senip, úiin nebári 7,5 million teńgege satýǵa kelisim bergen. Mámile eki kún ishinde rásimdelgen. Sol ýaqytta áieldiń jaqyn týysy qaitys bolyp, ol jerleý rásimine ketýge májbúr bolǵan. Aqshany kórshisine senip tapsyrǵan.
Kórshisi de alaiaqtardyń arbaýyna túsken bolyp shyqty. Keiin belgili bolǵandai, ol da osyǵan uqsas tásilmen aldanǵan, biraq bul týraly kesh bilgen. Aqshany kýrerge tapsyrǵannan keiin ǵana qaskóiler ózderi habarlasyp, istiń mán-jaiyn ashyp aitqan.
Oqiǵa áshkerelengen soń jábirlenýshiler politsiiaǵa júgingen. Alaida páterdiń jańa iesi úidi qaitarýdan bas tartyp, máseleni sot arqyly sheshýdi talap etken. Eki birdei sot protsesi jańa menshik iesiniń paidasyna sheshilgen.
Qorǵaýshy tarap zeinetkerdiń alaiaqtardyń yqpalymen áreket etkenin dáleldeýge tyrysyp, kassatsiialyq shaǵym ázirlep jatyr. Sonymen qatar taraptar máseleni sotqa jetkizbei, kelisim arqyly sheshý múmkindigin de qarastyrýda.
Qazir politsiia alaiaqtardy izdestirýde. Al zeinetker kez kelgen sátte úiden shyǵarylýy múmkin – onyń endi qaida barary belgisiz.
