Almaty oblysynyń politsiiasy velosipedtegi zeinetkerdi qaǵyp ketken júrgizýshini ustady, - dep habarlaidy Polisia.kz.
21 tamyz saǵat 19:36 shamasynda Jambyl aýdandyq PB-ǵa Taran aýylyna kireberiste belgisiz kólik velosiped mingen adamdy basyp, oqiǵa ornynan qashyp ketkeni týraly habarlama kelip túsken. Jol apaty saldarynan 81 jastaǵy er adam Jambyl aýdanynyń ortalyq aýdandyq aýrýhanasyna jetkizilgen.
Keiin áleýmettik jelilerde jol-kólik oqiǵasy bolǵan jerden kadrlar tarady.
Izdestirý is-sharalary barysynda politsiia qyzmetkerleri ZAZ Chance avtokóligin tizgindegen Qarasai aýdanynyń 61 jastaǵy turǵynyn anyqtady.
"Quqyqbuzýshyǵa qatysty QR ÁQBtK-niń 610-baby 2-bóligi ("Kólik quraldary júrgizýshileriniń jol júrisi qaǵidalaryn adamdardyń densaýlyǵyna ziian keltirýge, kólik quraldarynyń nemese ózge de múliktiń búlinýine alyp kelgen zańbuzýshylyǵy"), 611-baby 2-bóligi ("JKO ornyn qaldyrý") jáne 608-baby 3-bóligi ("Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúide basqarýy, sol siiaqty kólik quralyn alkogoldik, esirtkilik jáne (nemese) ýytqumarlyq masań kúidegi adamnyń basqarýyna berý") boiynsha ákimshilik is qozǵaldy", - delingen habarlamada.
Qazirgi ýaqytta ustalǵan azamat qamaýǵa alynǵan. Avtokólik aiyp turaǵyna qoiyldy.
Júrgizýshiniń mas bolý dárejesin anyqtaý úshin himika-toksikologiialyq saraptama taǵaiyndalǵan. Túpkilikti sheshim saraptamalyq zertteýler nátijesi boiynsha JKO materialdary negizinde qabyldanady.
