Almaty oblysynyń Panfilov aýdanyndaǵy úsh mektepke qazaq ziialylarynyń esimi berildi, dep habarlaidy "Ult aqparat".
Panfilov aýdany ákimi baspasóz qyzmetiniń málimetinshe, Qazaqstan Respýblikasy Úkimetiniń qaýlysymen Panfilov aýdanynda burynǵy A. Lýnacharskii atyndaǵy orta mektep-gimnaziiaǵa dańqty qolbasshy, Keńes Odaǵynyń batyry Baýyrjan Momyshulynyń esimi berildi. «Kóktal orta mektebi» mektepke deiingi shaǵyn ortalyǵy memleket jáne qoǵam qairatkeri Dinmuhamed Qonaevtyń atymen atalatyn boldy. Sondai-aq, Sátjol orta mektebine alash kósemi Álihan Bókeihanovtyń esimi berildi.
«Qazirgi ýaqytta Úkimettiń arnaiy qaýlysy shyqty. Endi aýdan ákimshiligi tarapynan atqarylatyn tiisti jumystardy atqaryp jatyrmyz», - dedi aýdandyq mádeniet jáne tilderdi damytý bóliminiń mamany Arman Iýsýpov.
Aita ketý kerek, búginde Panfilov aýdanynda orta bilim beretin 50 mektep bar.
