Almaty oblysynda Qazaqstan Respýblikasy Ulttyq ulany 5571 áskeri bóliminiń merzimdi qyzmettegi áskeri qyzmetshisi qaza boldy, - dep habarlaidy Tengrinews.kz agenttigi QR UU "Ońtústik" óńirlik qolbasshylyǵynyń baspasóz qyzmetine silteme jasap.
Jaýyngerlik daiyndyq josparyna sáikes 5571 áskeri bóliminiń 1 jedel maqsattaǵy batalon jeke quramy 2022 jyldyń 8 men 13 tamyzy aralyǵynda 5574 áskeri bóliminiń oqý ortalyǵynda dalalyq jattyǵýda bolǵan.
"9 tamyz saǵat 20:55 shamasynda qatty daýyl kóterilip, jel saldarynan sarbazdar ornalasqan shatyr qalashyǵy búline bastaǵan. Qatardaǵy A.N. Shahimov áriptesteriniń qaýipsiz orynǵa shyǵýyna kómektesip júrip shatyrdan sońǵy bolyp shyqqan kezde, shatyrdyń temir jaqtaýy basyna tiip jaraqat alǵan.
Qatardaǵy A.N. Shahimovqa jedel meditsinalyq kómek kórsetilip, sanitarlyq kólikpen Qonaev qalasyndaǵy qalalyq aýrýhanaǵa jetkizilgen. Qalalyq aýrýhana dárigerleri sarbazdyń qaitys bolǵanyn tirkedi.
Qatardaǵy A.N. Shahimov óziniń janqiiarlyq áreketimen joldastaryn qutqaryp, ókinishke qarai ózi qatty soqqydan qaza boldy", - delingen habarlamada.
Ol 2003 jyly dúniege kelgen. Ulttyq ulan qatarynda 2022 jyldyń kókteminde Aqmola oblysy Kókshetaý qalalyq Qorǵanys isteri jónindegi departamentimen shaqyrylǵan.
"Derek týraly kezekshi qyzmet jelisi boiynsha tiisti organdarǵa habarlandy. Oqiǵanyń mán-jaiy anyqtalyp, tergeý jumystary júrgizilip jatyr. Qyzmettik tekseris taǵaiyndaldy.
QR Ulttyq ulannyń Bas qolbasshylyǵy jáne "Ońtústik" óńirlik qolbasshylyǵy merzimdik qyzmet áskeri qyzmetshisi A.N. Shahimovtyń ata-anasy men jaqyndaryna orny tolmas qaiǵyǵa ortaqtasyp, kóńil aitady", - delingen habarlamada.
