Almaty oblysynyń tártip saqshylary QR Úkimetiniń qaýlysyna sáikes, Armeniiadan ákelingen kólikterdi ýaqytsha tirkeýge ruqsat berilgen merzimniń aiaqtalýyna sanaýly kún ǵana qalǵanyn eskertti, - dep habarlaidy "Ult aqparat".
«Qazirgi ýaqytta Mamandandyrylǵan halyqqa qyzmet kórsetý ortalyqtarynda Armeniiadan ákelingen kólikterdi ýaqytsha tirkeýge alý júrgizilip jatyr. Elimizde tirkelmegen sheteldik kólikti memlekettik tirkeýge qoiý úshin biregei múmkindiktiń aiaqtalý merzimi 1 qyrkúiekke deiin ǵana, iaǵni sanaýly kúnder ǵana qaldy. Memleket usynǵan múmkindikti utymdy paidalanyp, 301 avtokólik iesi temir tulparynyń qujattaryn rásimdedi», - dedi Almaty oblysy PD Ákimshilik politsiia basqarmasynyń bastyǵy Dáýlet Moldahanov.
Jol saqshylarynyń málimeti boiynsha, osy sátti paidalanyp, kóligin tirkemegen sanaýly ǵana sheteldik avtokólik ieleri qalǵan. Qazirgi ýaqytta atalǵan sheteldik tirkeýdegi avtokólikter men olardyń ieleriniń mekenjaiyn anyqtaý sharalary qabyldanýda.
Óz kezeginde, Almaty oblysynyń politseileri turǵyndardy qaýly talaptaryna sáikes keletin avtokólikterin ýaqytsha tirkeýge qoiý múmkindigin paidalanýǵa shaqyrady. Óitkeni, kúzdiń alǵashqy kúni tirkeý toqtaitynyn eskergen abzal.
Esterińizge sala keteiik, Memleket basshysynyń tapsyrmasyna orai qabyldanǵan QR Úkimetiniń 2020 jylǵy 20 mamyryndaǵy №306 qaýlysyna sáikes, Armeniia Respýblikasynan ákelingen kólikterdi elimizde ýaqytsha tirkeýge qoiý máselesi birizdendirilgen bolatyn. Atalǵan qujatta ýaqytsha tirkeý merzimi 2020 jyldyń 1 maýsymynan 1 qyrkúiegine deiin dep kórsetilgen.
