Almaty oblysynda belgisiz bireýler 16 jastaǵy oqýshy qyzǵa qorlyq kórsetken. Munysymen qoimai olar bul áreketterin videoǵa túsirip, áleýmettik jelige júktegen. "Astana" telearnasyna osylai shaǵymdanǵan boijetkenniń ata-anasy kinálilerdiń jazalanýyn surap otyr, - dep habarlaidy Tengrinews.kz tilshisi.
Telearna tilshisiniń sózinshe, oqiǵa 24 jeltoqsanda keshki ýaqytta bolǵan. 16 jastaǵy Galina áleýmettik jeli arqyly tanysqan eki qyzben ózen mańynda kezdesedi. Onyń aitýynsha, qyzdar osy jerde boijetkendi uryp-soǵyp, zorlyq-zombylyq kórsetetin eki jigitti shaqyrtqan.
Galinanyń aitýynsha, qos boijetken ózin syrttai baqylap júrgen. Kezdesý kezinde eshteńe túsindirmesten judyryq ala júgirgen. Basynan uryp, denesiniń saý-tamtyǵyn qaldyrmaǵan.
"Olar maǵan aýylda ózderi týraly qaýeset tarattyń dep ses kórsetti. Bizdiń nashaqor ekenimizdi, esirtki qoldanatynymyzdy kimge aittyń dep ura bastady. Men olardy múlde tanymaimyn da. Áleýmettik jelide kezdesý týraly jazǵanda da qoqan-loqy kórsetti", - deidi oqýshy qyz.
Boijetken qorlanǵany jaily alǵashynda úidegilerge tis jarmaǵan. Úsh kúnnen soń álgi qyzdar ony qaita soqqyǵa jyqqan. Kiimin sheship mazardyń ishimen ary-beri júgirýin buiyrǵan. Soraqysy bul qylyqtaryn videoǵa túsirip, jelige júktegen.
"Jeltoqsannyń 27-i qyzym úige kók ala qoidai bop keldi. Murny synǵan. Beti aýzy isip ketken. Alǵashynda ne bolǵanyn suraǵanymda aitpai qoidy. Keiin mán jáidi túsindirdi. Birden politsiia shaqyrdym. Biz zorlyq kórsetken eki jigittiń de olardy videoǵa túsirgen dostarynyń da ádil jazalanýyn suraimyz", - deidi boijetkenniń anasy Nadejda Tyrkova.
Politsiia Departamenti is boiynsha sotqa deiingi tergeý bastalǵanyn habarlady.
"Atalǵan derek boiynsha QR Qylmystyq kodeksiniń 123-baby 2-tarmaǵy boiynsha qylmystyq is qozǵaldy. Qazirgi tańda istiń mán-jaiyn anyqtaý maqsatynda, tiisti saraptamalar taǵaiyndalyp tergeý amaldary júrip jatyr", - dedi Almaty oblysy Politsiia departamentiniń baspasóz qyzmetiniń ókili Ábiltai Ábenov.
Telearna tilshisiniń málimetinshe, bul bap boiynsha 5 jylǵa deiingi merzimge bas bostandyǵynan aiyrý jazasy kózdelgen.
