Almaty oblysy Qarasai aýdanyndaǵy kóp balaly 10 otbasy jeke baspanalaryna qol jetkizdi. Qaskeleń qalasyndaǵy «Qarlyǵash» turǵyn úi kesheninen «Nurly jer» baǵdarlamasymen satyp alynǵan jańa páter kiltterin oblys ákimi Amandyq Batalov tapsyrdy, dep habarlaidy "Ult aqparat" aimaq basshysynyń baspasóz qyzmetine silteme jasap.
Jańa qonys ielerin qýanyshtarymen quttyqtaǵan oblys ákimi:
- Sizderdi jańa páterge ie bolýlaryńyzben shyn júrekten quttyqtaimyn. Men túske deiin aýdan ákiminiń ótken jyldy qorytyndylap, biylǵy jylǵa jańa mindetter belgilegen esepti jiynyna qatystym. Kóptegen máseleler «Nurly jer», «Nurly jol», «Baqytty otbasy», «Aýyl – el besigi» baǵdarlamalarynyń aiasynda sheshilip jatyr. Elbasynyń syndarly saiasaty men osy sara joldy Prezidentimiz Qasym-Jomart Kemeluly Toqaevtyń laiyqty jalǵastyrýynyń arqasynda, ásirese, kóp balaly jáne az qamtylǵan otbasylarǵa erekshe kóńil bólinip keledi. Biz óz tarapymyzdan turǵyndardy turǵyn úimen qamtýǵa basty nazar aýdaramyz. Men oblystaǵy tiisti sala basshylaryna biýdjettik turǵyn úiler salý men «Qarlyǵash» turǵyn úi keshenindegi siiaqty zamanaýi jáne sapaly kommertsiialyq turǵyn úilerdi satyp alý kólemin jyl saiyn arttyrý týraly tapsyrma berdim. Taldyqorǵan qalasynyń mańynda da kóz tartatyn kottedjdi qalashyq boi kóterdi. Mundai jańa shaǵyn aýdandarda turǵyndarǵa qolaily bolýy úshin balabaqshalar, mektepter, aýrýhana men saýda úileri siiaqty qajetti nysandardy birden josparlaimyz. Sonyń barlyǵy da halyqtyń igiligi úshin. Sizderdi qonys toilaryńyzben taǵy bir márte quttyqtaimyn, shańyraqtaryńyzǵa shattyq, bereke men baqyt tileimin, - degen A. Batalov jańa páter kiltterin tabystap, ár otbasyna jańa teledidar syiǵa tartty.
Qonys ieleri atynan sóz alǵan kóp balaly ana Marina Ýbaidýlaqyzy:
- Men osydan 4 jyl buryn turǵyn úi kezegine turdym. Osyndai qýanyshty kúnge tez jetemin dep oilamappyn. Eń aldymen bizge qamqorlyq kórsetken Prezidentke alǵysymyz zor. Barlyq qoldaýyna rizamyz. Qamqorlyq jasap, kóńil bólý - biz úshin eń úlken syi, - dedi ol.
Qarasai aýdanyna sapary barysynda Amandyq Batalov eń aldymen biylǵy jyldyń 8 qańtary kúngi gaz jarylysy oryn alǵan bes qabatty úige baryp, ondaǵy júrgizilip jatqan jóndeý jumystarynyń barysyn kórgenin atap ótý kerek. Oqiǵa kezinde úidiń birneshe páteri búlingen edi. Osy jerde oblys ákimi kóp qabatty úi turǵyndarymen kezdesti. Qaitys bolǵan eki adamnyń jaqyndary men týystaryna kóńil aityp, turǵyndarǵa páterlerdi qalpyna keltirý jumystary budan ári qalai júrgiziletini týraly túsindirip berdi.
- Jobalyq-smetalyq qujattaryn jasaýǵa qarjy bólindi, sizderde jylý bólek, tamaq daiyndaityn gaz bólek bolady. Ol úshin blok-modýldi qazandyq ornatylady. Bul qaýipsizdik úshin, ári sapaly bolý úshin kerek. Sonymen qatar aýla aýmaqtaryn kórkeitýge de qarjy bólip otyrmyz, - dedi A. Batalov. J.Dalabaevqa turǵyndardan jasaqtalǵan bastamashyl topty Talǵar aýdanyndaǵy «Boztorǵai», «Meliorator» turǵyn aýdandarynda salynǵan blok-modýldi qazandyqtardyń úlgisimen tanystyryp, kórsetýdi tapsyrdy. «Qandai jumysty da qurylys normalary men erejeleriniń barlyq talaptaryn saqtai otyryp, tehnikalyq esepteýlerdi eskere otyryp sapaly júrgizý kerek. Bul - eń basty talap, jáne ol gazǵa qatysty bolsa, talap tipti kúshti bolýy tiis», - dedi A.Batalov.
Saparynyń sońynda oblys ákimi Qaskeleń toptyq sý taratqyshyna baryp, ondaǵy jumystarmen tanysty. 3 kezeńmen júzege asyrylatyn jobanyń jalpy quny - 9,4 mlrd. teńge. Qazirgi kezde 1-kezeńi aiaqtalǵan, ol biylǵy jyldyń naýryz aiynda iske qosylady. Sonyń nátijesinde Qaskeleń qalasyndaǵy 60 myńǵa jýyq turǵyn ortalyqtandyrylǵan sý júiesine qosylady. 2022 jyly II kezeńin iske qosý josparlanǵan. Sol kezde Qairat, Shalqar, Jandosov, Shamalǵan, Tasqyn, Qumaral, Eńbekshi, Úshterek, Saýynshy, Áitei, Kóktóbe aýyldaryndaǵy 45 myńnan astam adam qamtylsa, 2023 jylǵa josparlanǵan III kezeńde 12 eldi meken qamtylady. Sý taratqyshtyń óndiristik qýaty táýligine 4150 tekshe metr taza sý taratýǵa jetedi.
