Almatyda bes adamnan turatyn otbasy joǵalyp ketti. Olardyń izdestirilip jatqany týraly aqparatty qoǵam belsendisi Islam Ýgýshev Facebook paraqshasynda jazdy, dep habarlaidy QazAqparat tilshisi.
Onyń jazýynsha, 41 jastaǵy Andrei men 39 jastaǵy Natalia Chýrýlinder jáne olardyń úsh balasy - Angelina (12 jasta), David (9 jasta) jáne Daniil (7 jasta) joǵalyp ketken. Barlyǵynyń estý qabiletteri nashar. Otbasy 4 tamyzdan beri bailanysqa shyqpaǵan.
«Turatyn jerlerinde eshkim esik ashpaidy, kórshileri de otbasynyń qaida ekenin bilmeidi. Erekshe belgileri - eresekter men balalardyń bári mylqaý, ymdasyp sóilesedi. Bir jaqqa ketetinderin aityp eskertpegen. Áieli men kúieýi 35-40 jas shamasynda. Boilary uzyn. Deneleri iri. Shashtarynyń túsi ashyq», - dep jazdy ol.
Chýrilinder otbasy týystarymen sońǵy ret 3 tamyzda sóilesken. 4 tamyzda áleýmettik jelige kirgen. Otbasynyń jaqyndary Alataý aýdanynyń politsiiasyna júgingen.
Almaty politsiiasy otbasynyń izdestirilip jatqanyn rastady.
«Joǵalǵan otbasy týraly aryz Alataý aýdandyq politsiia bólimine keshe keshkisin tústi. Dereý jedel-tergeý toby quryldy, onyń quramynda aýdandyq jáne qalalyq deńgeidegi kriminaldyq politsiia ókilderi bar. Qazirgi ýaqytta tehnikalyq quraldardy qoldana otyryp, otbasynyń boljamdy ornalasqan jeri anyqtalýda. Olardyń din aman ekenine senimdimiz. Týystarynyń aitýynsha, otaǵasy men onyń otbasy músheleri taza aýda serýendegendi jaqsy kóredi. Múmkin olar Almaty oblysynyń aýmaǵyna demalýǵa ketip, týystaryna eskertý jasaýdy umytyp ketken shyǵar. Qalai bolǵanda da, oqiǵa jaqsy aiaqtalatynyna úmittenemiz. Anyqtalǵannan keiin qosymsha aqparat beriledi», - dedi Almaty qalalyq Politsiia departamentiniń baspasóz qyzmetinen.
