Foto: Sportbugin.kz
Almaty oblysy Qarasai aýdanynda bokstan eńbek ardageri Amangeldi Bektasovty eske alýǵa arnalǵan birinshi respýblikalyq ashyq týrnir bastaldy. Dodaǵa Qazaqstannyń barlyq óńirleri men Qyrǵyzstan, Ózbekstan jáne Tájikstan boksshylary qatysyp jatyr, dep jazady Sportbugin.kz.
Tuńǵysh ret ótkizilip jatqan boks básekesi 2010-2011 jyly týǵan jasóspirim boksshylardyń basyn qosty.
Týrnirde jalpy esebi 300-ge jýyq sportshy baq synaýda. Jarystyń uiymdastyrýshysy Jeńis Bektasovtyń aitýynsha, bul dodany ótkizýdegi basty maqsat – jas boksshylarǵa jiger berip, bolashaq álem jáne Olimpiada chempiondaryna jol ashý.
«Ákemiz Amangeldi Bektasov bokspen shuǵyldanyp, salaýatty ómir saltyn ustandy. Ol Qarasai aýdanynda bokstan sport sheberligine úmitker dárejesin oryndaǵan tuńǵysh adam. Ómirin eńbekke, bala tárbiesine arnaǵan ákemiz qazaq boksynyń qara narlarymen birge júrdi. Serik Ábdenáliev, Valerii Rachkov syndy áigili sportshylar bizdiń úiimizde jii qonaq bolatyn. Ákemiz alty balasyn da sportqa baýlydy. Bárimiz áli kúnge deiin dene jattyǵýyn umytqan emespiz. Ómirden qaitar shaǵynda ol kisi qazaq boksynyń damýyna úles qosýdy amanat etti. Mine, sonyń sáti endi túsip jatyr. Jas boksshylarǵa qoldaý kórsetip, úlken jarystarǵa jol ashý maqsatynda osy týrnirdi uiymdastyrdyq. Kim biledi, bolashaq Olimpiada chempiondary osy sportshylardyń arasynda júrgen shyǵar?!», — deidi Jeńis Amangeldiuly.
Jarystyń qurmetti qonaqtary qatarynda Sidnei Olimpiadasynyń chempiony Ermahan Ybyraiymov, Beijiń Olimpiadasynyń kúmis júldegeri Nurbaqyt Teńizbaev, MMA sheberi Arman Ospanov, kásibi boksshy Sadriddin Ahmetovter bar.
«Boks qazaq halqy úshin árdaiym nómiri birinshi sport túri bolyp qala bermek. Osy oraida, jas boksshylardy yntalandyratyn keremettei týrnirdiń kýási bolyp otyrǵanymyzǵa qýanyshtymyn. Mundai básekeler jastarǵa jol ashyp qana qoimai, sheberligin shyńdap, tehnikasyn jetildirýge kómektesedi. Biz álemdegi myqty boks derjavalarynyń birimiz. Sondyqtan, bizdegi rezerv azaimaý kerek, qazaq judyryǵynyń qudyreti asqaqtai berýi tiis», — deidi Olimpiada chempiony Ermahan Ybyraiymov.
Týrnirdi uiymdastyrýshylar jarys jeńimpazdary men júldegerlerine estelik músinsheler, chempiondyq belbeýler men aqshalai júldeler taǵaiyndaǵan.
Jarys jeksenbi kúni máresine jetedi.
