© Photo : Telegram/ALMATY_KRIS_P
Almaty oblysy Boraldai aýylynda BMW X5 avtokóligi jer úige japsarlas salynǵan oryn-jaidyń shatyryna qulap, elektr baǵanasyn qiratty, dep habarlaidy Sputnik Qazaqstan agenttigi.
Oblystyq politsiia departamenti baspasóz qyzmetiniń aqparatynsha, jol apaty Ile aýdany Boraldai aýylynda 23-inen 24 mamyrǵa qaraǵan túni bolǵan.
"BMW X5" kóligin aidaǵan 29 jastaǵy jergilikti turǵyn rólge ie bola almai, joldan ushyp ketken. Sóitip jer úige japsarlas salynǵan nysannyń shatyryna qulaǵan. Gaz qubyry arkasyna zaqym kelip, elektr baǵanasy qulady.
Júrgizýshi jeńil jaraqat aldy, aýrýhanaǵa jatýdan bas tartty. Basqa zardap shekkender joq.
"Memleket pen 40 jastaǵy úi iesine keltirilgen shyǵyn eseptelip jatyr. Buǵan qosa, jol apaty saldarynan gaz shyqqan joq. Elektr energiiasy berildi", - delingen habarlamada.
Júrgizýshige qatysty ákimshilik is qozǵaldy. Sot jaqyn arada jinalǵan materialdy qaraidy.
