Almaty oblysynda kúieýimen birge asyrap alǵan balalardy soqqyǵa jyqqan áiel óz kinásin moiyndamai otyr. Bul týraly ol KTK telearnasyna bergen suhbatynda aitty, - dep habarlaidy Tengrinews.kz agenttigi.
Zýra Ómirzaqovanyń aitýynsha, ol tek tárbieleýmen ainalysqan. Sol kúni balalar janjaldasqannan keiin kúsh qoldanýǵa májbúr bolǵan.
"Urlyq jasaǵannan keiin, ótirik aitqannan keiin "jasyń 18-ge keldi ǵoi" dep, aqylymdy aitqam. Eshqandai aram oiym bolǵan joq. Bir aittym. Eki aittym. Til almaǵan soń, urdym. "Qoiyńdar" dep daýys kóteretin shyǵarmyn. Biraq balaǵattamaimyn. Men durys tárbie berip jatyrmyn dep oilaimyn", - dedi Zýra Ómirzaqova.
Al, balalardyń soqqyǵa jyǵylǵanyn videoǵa túsirip alǵan kórshisi shýly oqiǵanyń mán-jaiyn aityp berdi.
"Mundai jaǵdai birinshi ret bolyp turǵan joq. Únemi balalar aiǵailap, kómek surap jatady. Biz ótken jyly tiisti organǵa habarlaǵanbyz. Sol ýaqytta bul otbasy úiiniń aýlasyndaǵy monsha men saraidy osy kishkentai balalarǵa saldyrtqan. On jastan asqan uldardyń 17 kelilik kirpish tasyp júrgenin kórgende júregim aýyrǵan. Videoǵa túsirdik. Biraq bilim bólimindegiler eshqandai shara qoldanǵan joq", - dedi Kahramon Isanbetov.
Telearna málimetinshe, buryn áieldiń óz balalary men kúieýi bolǵan. Biraq bes jyl buryn kúieýi páterde ózin órtep jiberip, uly men qyzy da qaitys bolypty.
Eske salaiyq, áleýmettik jelide Almaty oblysynyń Ile aýdanynda erli-zaiypty asyrap alǵan balalaryn uryp-soǵyp jatqany túsirilgen video tarady.
