Almaty oblysynyń Panfilov aýdandyq perzenthanasynda ana men bala kóz jumdy. 24 jastaǵy Janar Baratova úshinshi balasyn bosanýy tiis bolǵan, dep habarlaidy QazAqparat.
Bir apta buryn sábidi jerlegen otbasy, endi Janardy jer qoinyna tapsyrdy. Olardyń sózinshe, 12 kún buryn Janardyń ishi ótip, infektsiialyq aýrýhanaǵa túsken. Ai kúni tolǵan áielge bir kúnde 9 sistema salynǵany aitylýda.
«Infektsiialyq aýrýhanaǵa jatqyzdy, sol kúni 9 sistema saldy. 9 sistemany áielim kótere almai, aýyryp, perzenthanaǵa túsedi. Ol kezde ai kúni tolyp turǵan kez. Perzenthanaǵa túski bir men úshtiń arasynda túsken. Túngi saǵat on ekige deiin oǵan eshbir dáriger kóz qyryn salmaǵan. Túngi on ekiden otyz minýt ketkende áielimniń jatyrynan sýy ketip, balanyń júregi toqtaǵan», – dedi marqumnyń joldasy Beiimbet Murat.
Sábi dúniege óli kelgen.
J.Baratovanyń joldasynyń sózinshe, qan toqtamaǵannan dárigerler eshbir týysynyń ruqsatynsyz jatyryn alyp tastaǵan. Biraq, qan ketý sonda da tyiylmaǵan. Beiimbet Murat eshbir saqtaý talabyn bilmese de, Almatydaǵy qan ortalyǵynan qan tasyǵanyn jetkizdi.
Dárigerlerdiń aitýynsha, áieldiń asqazanyndaǵy jara jarylyp, qan ketken. Alaida, patalogoanatomdardyń saraptama nátijesi ony joqqa shyǵarǵan.
«Saraptama qorytyndysy boiynsha, asqazanynda jara joq», - deidi marqumnyń joldasy.
Al dáriger Janardyń ólimine qan ketý sebep bolǵanyn aitýda.
«Bosanǵannan keiin qan ketý bastaldy. Asqazanynan, ishinen ketti. Qan ketý koronavirýsqa da bailanysty bolýy múmkin», - deidi «Panfilov aýdanaralyq kópsalaly aýrýhanasy» KMK direktorynyń ana men balany qorǵaý jónindegi orynbasary Gaýhar Baidahanova.
Qara jamylǵan januia eger kelinshek koronavirýstan qaitys bolsa, ol nelikten sanitarlyq talap boiynsha jerlenbegenin túsinbei dal.
Aq halatty maman bul jait boiynsha pikir bildire almaitynyn jetkizdi.
