Foto: Polisia.kz
Almaty oblysynyń politseileri shamamen 250 million teńge kóleminde zalal keltirgen aýqymdy internet-alaiaqtyq shemasyn áshkereledi, dep habarlaidy Ult.kz.
Jedel-izdestirý is-sharalarynyń nátijesinde oblystyq kiberqylmysqa qarsy kúres basqarmasynyń qyzmetkerleri Almaty qalasy men Almaty oblysy aýmaǵynda áreket etken qylmystyq toptyń uiymdastyrýshysy men úsh sybailas dropperdi ustady.
Politsiia málimetinshe, uiymdastyrýshy nebári 19 jasta, Almaty oblysynyń turǵyny. Tergeý málimetinshe, ol qylmystyq shemaǵa 2023 jyldyń qazan aiynan beri qatysqan. Aldymen qarapaiym drop retinde bastap, 2024 jyldyń maýsymynan bastap dropperlerdi basqarýǵa kóshken. 2025 jyldyń qańtarynan bastap kýrator retinde áreket etip, úsh dropperdi basqaryp kelgen.
Urlanǵan qarajatty qolma-qol aqshaǵa ainaldyrý úshin qaskúnemder 50-den astam jalǵan tulǵaǵa rásimdelgen banktik qosymshalary bar 30-dan astam mobildi qurylǵyny paidalanǵan. Sondai-aq noýtbýk, Resei bailanys operatorlaryna tiesili 11 SIM-karta jáne sheteldik qarjy uiymdarynyń banktik kartalary tárkilendi.
Aldyn ala esepteýler boiynsha, kýrator qylmystyq áreket barysynda shamamen 10 million teńge tabys tapqan, al onyń sybailastarynyń árqaisysy – 3 million teńgeden. 2025 jyldyń qańtarynda qarapaiym drop retinde jumysyn bastaǵan dropperlerdiń biri keiin kýratordyń senimdi kómekshisine ainalǵan. Ol tek aqshany sheship qana qoimai, bank esepshottary buǵattalǵan jaǵdaida basqa droptardy bankterge ertip barǵan.
Qylmystyq shemaǵa qatysy bar barlyq tulǵa ustalyp, Almaty oblystyq politsiia departamentine jetkizildi. Qazirgi ýaqytta qajetti tergeý amaldary júrgizilýde.
Tártip saqshylarynyń aitýynsha, barlyq qatysýshy men olardyń áreketteri naqty anyqtalǵannan keiin bankterge alaiaqtyq epizodtaryn tirkeý jáne keltirilgen zalal somasyn dál anyqtaý úshin sanktsiialanǵan suraýlar joldanatyn bolady.
