Almaty oblysynda jol apatynan eki eki politsei mert boldy, - dep habarlaidy "Ult aqparat".
Almaty oblysy Politsiia departamentiniń baspasóz qyzmetiniń málimetinshe, bul oqiǵa 17 tamyzda saǵat 22:00 shamasynda «Almaty-Óskemen» avtojolynda bolǵan. Anyqtalǵandai «Toiota kamri» kóliginde Almaty oblysy Ile aýdandyq politsiia bóliminiń eki inspektory bolǵan. Olar 21 jastaǵy Muhtar Nurtileý jáne 23 jastaǵy Sanjar Omarbek. Ekeýi de oqiǵa ornynda tilge kelmesten kóz jumdy. Úshinshi politsei, 21 jastaǵy Maqsat Ramazan túrli dene jaraqatymen aýrýhanaǵa tústi.
Almaty oblystyq Politsiia departamentiniń bastyǵy áleýmettik jeli arqyly júrgizgen tikelei efir barysynda oqiǵany rastady. Sonymen qatar, marqumdardyń jaqyndaryna kóńil aitty.
«Aldyn ala málimetter boiynsha, «Toiota kamri» markaly avtokóliginiń júrgizýshisi Almaty-Óskemen avtojolynyń boiymen soltústik baǵytta 46 km júrip ótip, aldyńǵy sol jaq dońǵalańy tesilip, sonyń saldarynan avtokólik 90 gradýsqa burylǵan. Osy sátte onyń artynan kele jatqan «Hiýndai aktsent» markaly avtokólik joǵaryda atalǵan avtokólikpen soqtyǵysqan.
Jol apatynyń saldarynan oqiǵa ornynda «Toiota kamri» kóliginiń júrgizýshisi men onyń jolaýshysy kóz jumdy», - delingen atalǵan vedomstvonyń baspasóz qyzmeti taratqan habarlamada.
Sondai-aq, «Ótegen batyr» kentindegi ortalyq aýrýhanaǵa túrli jaraqattarmen osy kóliktiń taǵy bir jolaýshysy jetkizildi. Atalǵan derek boiynsha QR QK 345-baby boiynsha qylmystyq is qozǵaldy. Tiisti saraptamalar taǵaiyndaldy.
