Almaty oblysy Boraldai kentinde kámeletke tolmaǵan qyzdy uryp-soqandardyń biri ustaldy, - dep habarlaidy "Ult aqparat" oblystyq politsiia departamentine silteme jasap.
13 mamyrda Almaty oblysy Boraldai kentindegi aialdamada eki áiel 16 jastaǵy qyzdy uryp-soqqan. Jasóspirim alǵan jaraqattaryna bailanysty Almatydaǵy balalar aýrýhanasyna jetkizildi.
Qylmysty ashý úshin jedel-tergeý toby qurylǵan. Politseiler kúdiktilerdi Almatydan Boraldai aýylyna jetkizgen taksi júrgizýshisin taýyp, 25 pen 40 jas aralyǵyndaǵy áielderdi uqsas belgileri boiynsha tekserip shyqqan.
"19 mamyrda Almatyda ótkizilgen jedel-izdestirý sharalary nátijesinde politsiia qyzmetkerleri 27 jastaǵy jergilikti turǵyndy ustady. Ol dálelder usynylǵannan keiin óz kinásin moiyndady. Oqýshyny urǵan ekinshi kúdikti áiel adamnyń da kim ekeni anyqtaldy. Ol - 30 jastaǵy Eńbekshiqazaq aýdanynyń Báiterek aýylynyń turǵyny. Biraq áli qolǵa túspedi. Ony ustaý boiynsha sharalar qabyldanyp jatyr", - dedi departament ókilderi.
Buǵan deiin Almaty oblysynda aialdamada 16 jastaǵy qyzdy eki áiel uryp-soqqany habarlanǵan bolatyn. Jasóspirim Almaty balalar aýrýhanasyna jetkizilgen. Áleýmettik jelilerde zardap shekken jasóspirimniń sýreti tarady. Jazba sipattamasynda oqiǵanyń Boraldai kentindegi "Saharnyi" aialdamasynda bolǵany aitylǵan.
Keiin 16 jastaǵy Kamilanyń anasy áleýmettik jelilerde úndeý jasady. Ol áielderdi tanityndar bolsa habar berýdi suraǵan edi.
