Foto: © Sputnik / Tabyldy Kadyrbekov
Almaty oblysynyń Kegen aýdanyndaǵy Saty aýylynda 10-synyp oqýshysy kóz jumdy, dep habarlaidy Sputnik Qazaqstan.
Oqiǵa 11 sáýir saǵat 23:00 shamasynda bolǵan. Aýyl turǵyndarynyń aitýynsha, 10 jáne 11-synyp oqýshylary arasynda ózara kikiljiń týǵan. Joǵarǵy synyp oqýshylary "úlkendik" jasap, máseleni sheshý úshin keshke 10-synyptyń oqýshylaryn ózen boiyna kezdesýge shaqyrady.
"Urdy degen balamen sóilesip edim, "aǵa, men urmadym. Qarańǵy edi, ózim túsinbei qaldym" dedi. Eki bala da ónegeli otbasyda ósken. Balalardyń arasynda tóbeles bolmaǵan. Ózara sózben sheshpek bolǵan", - deidi Saty aýylynyń ákimi Rústem Álimov.
Sol jerde bolǵan balalardyń aitýynsha, kúdikti marqumnyń keýde tusynan urǵan, ol shalqalap baryp qulaǵan. Jasóspirimdi qasynda turǵan balalar turǵyzbaq bolǵan. Alaida Mirastyń júregi toqtap qalǵan. Janushyra júgirgen jasóspirimder aýyl meiirbikesi men úlkenderdi kómekke shaqyrǵan. Biraq bári kesh bolady.
Qaitys bolǵan Miras Áskerbaidyń ákesi aýylda elektrik, anasy mektepte qyzmet etedi. Al jasóspirimdi óltirdi degen kúdikke ilingen 17 jastaǵy oqýshynyń ákesi de eńbekqor jan, nan pisirip satatyn azamat.
Oblystyq politsiia departamentiniń baspasóz qyzmeti kúdikti oqýshy qamaýǵa alynǵanyn habarlady. Bul derek aýdandyq politsiiada QR QK 106-babynyń 3-bóligi boiynsha tirkeldi.
Sot-meditsinalyq saraptama jasalady, qajetti tergeý áreketteri júrgizilip jatyr.
Búgin Mirastyń denesi jer qoinyna tapsyryldy.
