Almaty oblysy Qarasai aýdany Jambyl aýylynyń turǵyndary shuryq-tesik jolǵa narazylyq bildirip, respýblikalyq mańyzy bar tasjoldy jaýyp tastady, - dep habarlaidy Tengrinews.kz.
Jambyl aýyly "Almaty-Nur-Cultan" tasjoly boiynda ornalasqan. Kún saiyn munda júzdegen jeńil jáne júk kóligi ótedi. Turǵyndardyń aitýynsha, "Beibitshilik" kóshesi uzaq ýaqyt boiy jóndelmegen.
"Kóktem men kúzde bul jerden óte almaisyń. Jedel járdem de, taksi júrgizýshileri de jete almaidy. Jol nashar bolýyna bailanysty ózimizge de, balalarǵa da birneshe ret aiaqkiim satyp alýymyz kerek. Ákimdik áreket etpei otyr, bul narazylyq belgisi - jergilikti bilik úshin eskertý", - deidi aýyl turǵyndary.
Jambyl aýyly ákimdigi ókili kósheni jóndeý jobasy daiyn ekenin aitty. Alaida qarajat áli bólinbegen.
"Tasjolday jóndeýge biýdjet qarajatyn bólý úshin jobalaý-smetalyq qujattama qajet. Sebebi ol qujat jóndeý jumystarynyń túri men qunyn anyqtaidy. Búginde Jambyl aýyly "Beibitshilik" kóshesiniń qujaty daiyn. Sol boiynsha biýdjettik ótinim Almaty oblysynyń kezekti sessiiasynyń máslihatyna jiberiledi. Tiisti qarajat bólingennen keiin jóndeý jumystary júrgiziledi", - dedi jergilikti ákimshilik qyzmetkeri.
Al aýyl turǵyndary oqý jyly bastalǵanǵa deiin kósheni jóndeýdi talap etip otyr. Olai bolmaǵan jaǵdaida, "Almaty - Nur-Sultan" tasjolyn bir táýlikke jabýǵa nietti.
