Áleýmettik meditsinalyq saqtandyrý qorynyń filialy Almaty oblysynyń meditsinalyq uiymdaryna naýryz-maýsym ailarynda 3,43 mlrd teńge tóledi. Bul týraly «Jetisy media»-da ótken brifing barysynda belgili boldy, dep habarlaidy "Ult aqparat".
Bólingen qarajat meditsinalyq kómek kórsetýge, meditsina qyzmetkerlerine erekshe eńbek jaǵdailary úshin qosymsha aqy tóleýge, statsionar deńgeiindegi PTR-diagnostikaǵa, sondai-aq ambýlatorlyq-emhanalyq kómek deńgeiindegi PTR-diagnostikaǵa baǵyttalǵan.
Áleýmettik meditsinalyq saqtandyrý qorynyń Almaty oblysy boiynsha filial direktory Nurlan Otarǵalievtiń aitýynsha, meditsina qyzmetkerlerine erekshe eńbek jaǵdailary úshin qosymsha aqy tóleý somasynyń edáýir artýy baiqalady. Bul kórsetkish shilde aiynda – 1,52 mlrd teńgeni quraǵan.
«Respýblikalyq biýdjet qarajatynan Almaty oblysynyń meditsina qyzmetkerlerine qosymsha aqy tóleýge 2,89 mlrd teńge bólindi. Ai saiyn koronavirýs infektsiiasy boiynsha 1447-den 5362 qyzmetkerge ústemeaqy tólenedi», - dep atap ótti Nurlan Otarǵaliev.
Aita keterligi, óńirde naýqastardy emdeýge 3455 meditsina qyzmetkeri jumyldyrylǵan.
Aýyr naýqastarǵa keńes berý úshin aýdandyq jáne oblystyq deńgeide oblystyń jetekshi mamandary tartylǵan eki ortalyq jumys isteidi. Al sońǵy aptada aýyr naýqastardyń sany 32% azaidy, 20% jaǵdaidyń jaqsarǵany baiqalady.
