Búgin oblys ákimi Amandyq Batalov selektorlyq jiynda Almaty oblysynda koronavirýsty taratýǵa jol bermeý baǵytynda atqarylyp jatqan jumystardy pysyqtady. Sonymen qatar oblys aýmaǵynda shekteý sharalaryn kúsheitýge qatysty aýdan, qala ákimderine, tiisti sala basshylaryna naqty tapsyrmalar berdi.
Oblystyq densaýlyq saqtaý basqarmasynyń málimetine qaraǵanda, óńirde virýs juqtyrǵan 8 azamattyń da jaǵdaiy qanaǵattanarlyq dep baǵalanýda, qajetti em sharalary jasalyp jatyr. Al olarmen bailanysta bolǵandar anyqtalyp, karantinge alynǵan.
Óz kezeginde oblys ákimi virýs oshaǵy anyqtalǵan úilerdiń podezin nemese mańaiyn ǵana emes, sol úi turǵan aýlany, kósheni, trotýardy túgeldei dezinfektsiialaý qajettigin eske saldy. Eldi mekenderdi zararsyzdandyrýǵa qajetti tehnikalardy tartý, dezinfektsiialaý sharalaryn der kezinde jáne sapaly júrgizý virýspen kúrestiń nátijeli bolýyna yqpal etetin mańyzdy shara ekenin aýdan, qala ákimderine qatań eskertti.
Amandyq Batalov oblysta qurylǵan qaiyrymdylyq qorynyń jumysyn shiratý kerektigin aitty. Virýs oshaǵy anyqtalǵan aýlalarda, eldi mekenderde qansha adam turady, olardyń ishinde qanshasy náreste, qanshasy qart adam, basqa da áleýmettik sanatqa kiretin azamattar qansha ekenin, olardyń muqtajdyǵy bar-joqtyǵyn anyqtaý – birinshi kezektegi másele. Anyqtalǵan málimetter boiynsha qordyń qarjysyna qajetti kómekterdi uiymdastyrý isin qolǵa alý kerek. «Erteń maǵan qaiyrymdylyq qorynyń jumysy jandandyryldy ma, qandai is atqardy, sol týraly esep beresińder. Jáne ol kóz úshin emes, shyn muqtaj adamdarǵa kómek kórsetý úshin atqarylýy tiis», - dep A. Batalov qadap aitty.
Oblys aýmaǵyndaǵy halyqty maskamen jetkilikti deńgeide qamtamasyz etý úshin maska tigýge shaǵyn jáne orta biznes nysandaryna memlekettik tapsyrys berý qajet. Oblys ákiminiń orynbasary Serik Turdalievtiń aitýynsha, qazir óńirde kúnine 136 myń maska tigilýde. Biraq Amandyq Batalov onyń áli de azdyq etetinin, sanyn arttyrý sharalaryn qabyldaýdy tapsyrdy.
Al iri kásiporyndar óz jumysshylarynyń kásiporyn aýmaǵynan eshqaida shyqpai jumys isteýine jaǵdai jasap, barlyq sanitarlyq talaptardy saqtai otyryp, jumystaryn jalǵastyra beretin bolady.
Oblys ákiminiń tapsyrmasyna sáikes daiyndalǵan shekteý talaptaryn kúsheitý týraly qaýlynyń mátinin oblystyń bas sanitar dárigeri Qairat Baimuhambetov oqyp berdi. Qaýlyda aýdandar men qalalarda, sol qatarda Shyǵys Qazaqstan jáne Jambyl oblystarymen shektesetin aýmaqtarda qosymsha sanitarlyq posttar qoiylatyny aitylǵan. Oblys aýmaǵynda, sonyń ishinde Shyǵys Qazaqstan jáne Jambyl oblystarymen shekarada júk tasymaldaýshy, jetkizý qyzmetiniń qyzmetkerleri men kólikteri, óńirdiń tirshiligin qamtamasyz etýge qajetti arnaiy kólikter, meditsinalyq uiymdar men memlekettik jáne quqyq qorǵaý organdarynyń qyzmetkerleri men kólikterinen basqa jeke kólikter men adamdardyń qozǵalysy shekteledi. Buǵan deiin Almaty qalasyna tek meditsina mamandarynyń kirip-shyǵýyna ruqsat etilse, endi olarǵa da ruqsat etilmeidi.
Sol siiaqty áýejaidyń jumysy, aýdandyq, qalalyq avtovokzaldardyń, avtostantsiialardyń qalaaralyq, aýdanaralyq avtobýs bailanystary toqtatylyp, resmi taksi qyzmetinen basqa jeke tasymaldaýshylardyń júrýine tyiym salynady.
Jármeńkeler ótkizilmeidi, azyq-túliktik emes saýda ortalyqtarynyń, biznes-ortalyqtardyń, internet jáne kompiýterlik klýbtardyń, oiyn mekemeleriniń, bazarlardyń, qoǵamdyq tamaqtaný oryndarynyń, dini mańyzdaǵy nysandardyń, menshik nysanyna qaramastan mektepke deiingi mekemelerdiń jumysy ýaqytsha toqtaidy. Jasy 65-ten asqan azamattardyń kóshede júrýine shekteý qoiylyp, olarǵa qajetti azyq-túlik pen medikamentterdi úilerine jetkizip berý qamtamasyz etiledi. Kámelettik jasqa tolmaǵandar da ata-anasynsyz óz betimen syrtta júre almaidy. Saiabaq, skver, ortalyq alań siiaqty halyq kóp jinalatyn oryndarǵa barýǵa bolmaidy, ol jerlerde politsiia posttary ornatylady.
Azyq-túlik dúkenderi men dárihanalardyń jumys ýaqyty saǵat 8.00-den 20.00–de deiin, al ekinshi deńgeili bankterdiń, poshta bailanysynyń, jeke notariýstardyń qyzmetteri saǵat 10.00-den 16.00-ge deiin shekteýli bolady.
Jergilikti atqarýshy organdar qoǵamdyq oryndarda bir otbasynyń múshelerinen basqa 3-ten artyq adamnyń jinalýyna, otbasylyq sharalar ótkizip, qonaq shaqyrýǵa, qonaqqa barýǵa bolmaitynyn da eskertip otyr. Sol siiaqty syrtqa maskasyz shyǵýǵa tyiym salynǵan.
Azyq-túlik, medikamentter, jeke qorǵaný quraldaryn, zararsyzdandyrý quraldaryn shyǵaratyn obektilerden basqa shaǵyn jáne orta biznes nysandary ýaqytsha jumys istemeidi nemese jumysyn qashyqtan isteýdi qamtamasyz etýi tiis.
Sol siiaqty aýyl sharýashylyǵy men qurylys salasyndaǵy jumystar barlyq sanitarlyq jáne dezinfektsiialyq sharalardy qatań saqtai otyryp júrgiziledi.
- Biz oblysta virýs juqtyrǵan adamdar sanynyń artýyna bailanysty shekteý sharalaryn kúsheitýge májbúrmiz. Engiziletin shekteý talaptaryn karantin kezindegiden de qatań saqtaýymyz kerek. Karantin engizilgen Almaty qalasymen shekaralas bolǵandyqtan, oblysta on ese saq bolýǵa tiispiz. Qabyldanǵan qaýlynyń ár tarmaǵynyń oryndalýy qatań qadaǵalansyn. Posttardyń ne úshin qoiylǵanyn, qandai shekteý sharalary engizilgenin jergilikti ákimdikter halyqqa jete túsindirýi tiis. Bizde virýstyń taralýyna jol bermeý sharalaryna qajetti tehnika jetkilikti, qarjy bar, múmkindikter qarastyrylǵan. Bul jumystyń nátijeliligi eń aldymen jergilikti jerdegi ákimderdiń jinaqy, naqty, jedel jumys isteýine bailanysty. Sondyqtan maǵan kúndelikti ár aýdan, qala boiynsha naqty málimet berip otyrasyńdar, - dedi A. Batalov. Sol siiaqty shekteýlerdi kúsheitý týraly arnaiy brifing ótikizip, halyqqa uǵynyqty, tolyqqandy málimet berýdi tapsyrdy.
Osy jiynda «Jumyspen qamtý jol kartasy» baǵdarlamasy aiasynda júzege asyrylatyn jobalar, kóktemgi dala jumystaryn der kezinde júrgizý máseleleri de talqylandy.
Atap ótsek, oblystyń bas sanitarynyń qaýlysyna sáikes 30 naýryzdan 31-ine qaraǵan túngi saǵat 00-den bastap Almaty oblysy aýmaǵynda shekteý sharalary kúsheitiledi.
