Almaty oblystyq qylmystyq atqarý júiesi probatsiialyq baqylaýda júrgen Janbolat Mamaidyń kezdeisoq tekserilgenin, ony túrmege qamamaitynyn habarlady. Bul aqparatty Almaty oblysy Qarasai aýdanynyń politsiia basqarmasynyń aldynda belsendi, jýrnalist Janbolat Mamaidyń ózi taratyp, advokaty Janar Balǵabaeva rastady.
Aqparatqa qaraǵanda, Qarasai aýdandyq politsiia basqarmasynda Almaty oblystyq qylmystyq atqarý júiesi basshylarynyń biri Janbolat Mamaimen kezdesip, eshqandai aiyp taǵylmaitynyn aitqan.
Búgin tańerteń Janbolat Mamai Almaty oblystyq qylmystyq atqarý júiesi qyzmetkerleriniń shaqyrý qaǵazymen Qarasai aýdany politsiia basqarmasyna barǵan. Oǵan bir top belsendi qoldaý kórsetken.
Janbolat Mamaidy qoldaýǵa barǵan saiasatker Tólegen Júkeevtiń aitýynsha, "Janbolatty senbi, jeksenbide zańsyz tekserip, politsiiaǵa shaqyrtýynyń saiasi astary bar". Biraq saiasi daýǵa ainaldyrǵysy kelmegendikten aiyp taǵýdan tartynǵanǵa uqsaidy.
- Halyqtyń qazirgi kóńil kúiin baiqap, saiasi daýǵa ulasyp ketpesin degen joǵarǵy jaqtyń saiasi sheshimi bolýy kerek. Áitpese politsiia qyzmetkerleri Janbolatty kezdeisoq emes, arnaiy izdep bardy, - deidi saiasatker Rysbek Sársenbai.
Janbolat Mamai 9 qarashada, senbi kúni Qarasai aýdandyq probatsiia qyzmetiniń úsh ókili kelip, shaqyrý qaǵazyn tabystaǵanyn habarlaǵan edi. Bul týraly feisbýk áleýmettik jelisindegi paraqshasy arqyly tikelei efirde aitqan Janbolat Mamai "senbi, jeksenbi kúnderi probatsiia qyzmetkerleriniń tekserýi zańsyz ekenin, bul áreketti ózine jasalǵan saiasi qysym dep baǵalaitynyn" málimdep, aqparat quraldary men belsendilerdi qoldaýǵa shaqyrǵan.
- Probatsiia qyzmetinde 2017 jyldyń 29 qyrkúieginen bastap baqylaýdamyn. Osy ýaqytqa deiin birde bir ret kúndiz teksergen emes. Zań boiynsha, saǵat onnan keiin tekseredi. Senbi kúni, ruqsat etilmegen mitingini kórýge ketkenimde teksergeni, ruqsatsyz ketti dep aiyptaǵasy keletini saiasi qysym dep bilemin. Áli de birneshe ai probatsiia baqylaýynda bolýym kerek. Kóktemde "Politon" klýbyn júrgizdi dep eskertý berdi. Endi taǵy bir eskertý berse, qaitadan túrmege qamalýym múmkin, - degen bolatyn.
Sol kúni Janbolat Mamaidyń áieli, quqyq qorǵaýshy Inga Imanbai áleýmettik jelide jariialaǵan videoda "politsiianyń úsh qyzmetkeri senbi kúni túste Janbolat Mamaidy izdep kelip, hattama toltyrǵanyn" kórsetken. Videoda politsiia qyzmetkerleriniń "Janbolat Mamai kúndiz de probatsiia qyzmetinen suranýy tiis" degeni estiledi.
Janbolat Mamai taiaýda "Qazaqstannyń demokratiialyq partiiasyn" qurý týraly bastama kótergen. Osy maqsatta Qazaqstannyń oblystaryn aralaýǵa politsiianyń probatsiia qyzmeti ruqsat bermei otyrǵanyn habarlaǵan.
