Foto: © Sputnik / Kamshat Abdiraiym
Almatyda "Saryarqa" jáne "Baýyrjan Momyshuly" metro stantsiialary iske qosyldy, - dep habarlaidy Tengrinews.kz.
Saltanatty ashylý 30 mamyr kúni ótti. Jańa stantsiialar qazirgi qyzmet kórsetip turǵan toǵyz stantsiianyń jalǵasy retinde qala ortalyǵyn jatyn aýdandarmen bailanystyrady.
Eki jańa stantsiia iske qosylǵaly metro jelisiniń jalpy uzyndyǵy 3,1 shaqyrymǵa uzaryp, endi 13,4 shaqyrymdy quraityn boldy. Jeli boiyna 7-10 minýt saiyn júretin tórt vagondy 15 elektr poiyzyn jiberý josparlanyp otyr.
Qazirgi tańda metro kúnine 45 myńǵa jýyq jolaýshy tasymaldaidy. Jańa stantsiialar iske qosylǵannan keiin bul kórsetkish kúnine 85 myń jolaýshyǵa deiin ósedi dep josparlanyp otyr.
"Máskeýden" keiingi "Saryarqa" stantsiiasy Abai dańǵyly boiynda Altynsarin dańǵyly men Sain kósheleriniń aralyǵynda Family Park mańynda ornalasqan. Tereń salynǵan, eki kireberisi men bir vestibiýli bar. Stantsiiada eki jedelsaty men segiz eskalator ornatylǵan. Interer jasaý kezindegi negizgi ideia - Saryarqanyń sheksiz keń dalasynyń ásemdigin kórsetý. Qabyrǵalary mármár tastardan qurastyrylyp, granitpen órnektelgen. Shetki jaǵyndaǵy qabyrǵada jazyq dalanyń ústinen shyǵyp kele jatqan kún, onyń bergi jaǵynda Qazaqstan astanasy beinesi mańynda shaýyp kele jatqan júirik attar beinelengen panno ornatylǵan.
"Baýyrjan Momyshuly" stantsiiasy Abai dańǵyly boiynda Momyshuly kóshesiniń batysynda ornalasqan. Taiaz ornalasqan, eki vestibiýl men alty kireberisi bar. Stantsiiada alty jedelsaty men on bes eskalator ornatylǵan. Platforma uzyndyǵy 108 metr Almaty metro jelisiniń on birinshi stantsiiasy ázirge sońǵy stantsiia bolyp sanalady.
Stantsiia úlken turǵyn alabynyń ortasynda ornalasqan. Qabyrǵalar men tireýishterdi bezendirý úshin ashyq reńkti marjan-sur tústi aǵash tektes keramikalyq panelder, al edendi qaptaýǵa - ashyq sur tústi tabiǵi granit paidalanylǵan.
Bolashaqta "Qalqaman" stantsiiasy qurylysyn aiaqtap, metrony batys baǵytta "Barlyq" bazaryna deiin damytý josparlanǵan.
