Jedel izdestirý sharalarynyń nátijesinde Almaty qalasy men Almaty, Jambyl oblystarynda 145 qarý-jaraq tárkilendi. Bul týraly qalalyq politsiia departamenti basshysynyń orynbasary Rýstam Ábdirahmanov málim etti, dep habarlaidy QazAqparat.
«Jedel izdestirý sharalarynyń nátijesinde Almaty qalasy men Almaty, Jambyl oblystarynda 145 qarý-jaraq tárkilendi, onyń 82-si Almaty qalasynda ornalasqan qarý-jaraq dúkenderinen urlanǵany belgili boldy», - dedi politsiia ókili.
Sonymen qatar, ol qarý qabyldaý aktsiiasy jalǵasyp jatqanyn tilge tiek etti.
«Azamattarǵa zańsyz saqtalǵan nemese tabylǵan qarýdy óz erkimen tapsyrý múmkindigi beriledi. Sonymen qatar, QR QPK-niń 287 babyna sáikes - qarý men oq-dárilerdi tapsyrǵan adamdar qylmystyq jaýapkershilikten bosatylady», -dedi ol.
Rýstam Ábdirahmanov meditsinalyq mekemede jatqan 16 kúdiktiniń tergeýge alynǵanyn aitty.
«16 adam Qazaqstan Respýblikasy Qylmystyq kodeksiniń 272-babynda kózdelgen qylmys, iaǵni jappai tártipsizdikke qatysqany úshin sotqa deiingi tergep-tekserýdiń biryńǵai tizilimine tirkelgen qylmystyq is boiynsha kúdikti»,- dep túsindirdi ol. Joǵaryda atalǵan kúdiktilerge qatysty tergeý soty bultartpaý sharasyn sanktsiialady. «Qamaý izoliatoryndaǵy jaralylarǵa barlyq qajetti meditsinalyq kómek kórsetiledi», - Rýstam Ábdirahmanov.
