Almaty mańynda ushaq apatynan jaraqat alǵan ekinshi ushqysh jansaqtaý bóliminen palataǵa aýystyryldy. Bul týraly № 4 qalalyq klinikalyq aýrýhananyń bas dárigeriniń mindetin atqarýshy Aiman Baizoldanova aitty, dep habarlaidy "Ult aqparat".
«Ushqysh esin jidy, jaǵdaiy turaqtandy. Jansaqtaý bóliminen beiindi bólimshege aýystyryldy. Sóiledi, qoiǵan suraqtarǵa jetkilikti deńgeide jaýap bere alady», - dedi Aiman Baizoldanova.
Barlyǵy 22 operatsiia júrgizilgen, olardyń bári sátti aiaqtalǵan.
27 jeltoqsanda tańerteń Bek Air áýe kompaniiasynyń Fokker-100 ushaǵy Almaty áýejaiyna jaqyn jerge qulap, sol mańdaǵy úige soǵylǵan. Ushaqta 93 jolaýshy jáne ekipajdyń bes múshesi bolǵan. 12 adam qaza taýyp, ondaǵan jolaýshy aýrýhanaǵa túsken. Ushaq soǵylǵan úidiń jańadan salynyp jatqany, apat kezinde úide ishinde adam bolmaǵany habarlanǵan.
Jeltoqsannyń 30-y kúni Almatyda arnaiy baspasóz jiynyn ótkizgen Bek Air áýe kompaniiasynyń ókilderi Fokker-100 ushaǵynyń "tehnikalyq jaǵdaiy jaqsy bolǵan" dedi. Kompaniia basshylyǵy "Fokker-100 ushaǵy áýege kóterilerden bir minýt buryn ushqan aýyr salmaqty Airbus-321 ushaǵynyń ilespe tolqyny áser etip, ushaqty basqarýdy kúrt qiyndatqan bolýy múmkin" degen boljam aitqan.
Biraq "Qazaeronavigatsiia" memlekettik kásiporny bas direktorynyń birinshi orynbasary Faat Bogdashkin Bek Air kompaniiasy ókiliniń "Fokker 100 ushaǵynyń apatqa ushyraýyna ózge ushaqtyń áýe tolqyny áser etken bolýy múmkin degen sózi shyndyqqa janaspaidy" dep málimdegen.
Premer-ministr Asqar Mamin apattan qaza bolǵandardyń otbasyna tórt million teńgeden (shamamen 10,5 myń dollar) tólenetinin aitty. Ushaq apatynyń sebebi anyqtalǵanǵa deiin Bek Air áýe kompaniiasyna berilgen litsenziia ýaqytsha toqtatyldy.
