Jetisý oblysynyń politseileri Almaty mańyndaǵy kóknár alqabynda drift jasaǵan BMW júrgizýshisin anyqtady, - dep habarlaidy "Ult aqparat".
Oblystyq politsiia departamentiniń málimetinshe, tártip buzýshy, iaǵni BMW avtokóliginiń iesi - 34 jastaǵy Kerbulaq aýdanynyń turǵyny.
«Júrgizýshiniń is-áreketinde QR ÁQBtK-niń 386-babynda (Jasyl ekpelerdi kútip-ustaý jáne qorǵaý qaǵidalaryn buzý) kózdelgen zańbuzýshylyq qarastyrylǵan. Belgili bolǵandai, er adam qazir jumys babymen issaparda. Qaityp kelgennen keiin ol qoldanystaǵy ákimshilik zańnamaǵa sáikes jaýapkershilikke tartylady. Is baqylaýǵa alyndy», – delingen oblystyq politsiia departamenti baspasóz qyzmetiniń habarlamasynda.
Eske salaiyq, áleýmettik jelide BMW túsirilgen video tarap jatyr. Kadrlarda kólik júrgizýshisi gúlder alqabynda ainalyp júrgeni kórsetilgen.
